確診下跌。個別一兩日不足為準。但o殺入社區已多天，確診仍未見飆升，應該係好兆頭。
由於o係現階段主要既毒株，感染3-4日就病發，快過原來的病毒，按大專家建議，竹篙灣疫監由21日改為14日，接著7日家居帶手環。意思係：如果14日都唔發病，唔可能中o。
但斷估，有8成人在港wan咗兩年，急於去發達地區旅遊、探親、留學，會要求返港既隔離期睇齊疫監。呢個民意與旅遊、航空業界聯手，壓力會好難頂。
但從美歐日返港要隔離21日，是否關乎呢的國家對中國既態度，唔止檢疫咁簡單？
塞浦路斯發現：δ與o兩大變種雜交成‘del-omi’（唔好問我呢個字點讀），未知是否衰過δ和o。但看o至今的發展，我賭衰極都有自然界既制衡。
O就好明顯，有辣有唔辣：辣在傳播力好似Usant Bolt跑100，連δ都食塵，而且發病快。唔辣在：病毒只攻鼻和喉，唔落到肺，幾乎唔會有肺炎。病情雖然輕唔過流感，但一般人感染，應該都可安度—老弱又當別論。這或許就係專家話：中招當打針，復原後就有抗體啦嘛！
唔怕講，我對港人打針既態度，估得好錯。當初以為只有幾個%死硬。後來先知，各種原因夾埋，唔想打針既怕有三成。最近先念到：最主要既原因唔係政治，而係港人歷來既習性：冇必要就無謂煩，國語話：不見黃河不流淚。港人既‘黃河’原來係飲茶行街吹水…。睇罷唔打唔入得茶居、舞池，的傳統市民先至湧到去。其中多數係基層既長者。
下一組比較難辦既係院舍既長者，通常要子女簽字授權才能打。這涉及子女的傾向、聯絡、行政…，有專家建議授權院舍徵詢院友，院友冇意見就算OK。但我估院舍會擔心：而家人心複雜，動輒抬出人權，最怕被子女告僭越。
沒有留言:
張貼留言