抽血日。前一晚禁食，醫院要我第一輪到，方便接著食早餐。但要轉幾次車，七點零就要出門，早過人返工，但早唔過學生。而家讀書似乎真係幾辛苦。
抽完血，想順便打埋流感，但有關部門未開工，只好改去食早餐。事前查過交通App，就近行去巴士站。點知等錯倒頭車。係金秋陽光下伸展時，見對面馬路有車，仲以為地近另一頭既總站，車長預先打定回程路標。後來再睇車站既指標，先知自己幾咁矇。
我錯在死信‘常識’：旺區都喺平地，由半山既醫院去鬧市，梗係落坡既方向啦！但原來，喺醫院落九龍要扳山，落去另一邊既平地，上坡既巴士先啱！
我其實讀書時就試過。個陣係土瓜灣人地屋企寄居。有一朝返學帶漏嘢，食晏時要番去攞。但搭巴士要轉車，趕唔到上堂，只好扳何文田山落土瓜灣，再原路返校。
個時嗰山禿到好似而家新聞裡既阿富汗。時為盛夏，當時行山冇帽、墨鏡、水，曬到個頭‘慶’既。記得一程大半個鐘，沿途幾乎未見過人。但念落又好在，否則打劫都冇仇報。
其實，而家係九龍東去油尖，搭巴士都要上斜，只不過坐過唔記得。今朝最後行番最穩陣既路：由醫院行斜路落市中心，再轉地鐵去油尖。
抵達澳牛時尚早，未有人輪隊，但室內幾無虛席。舊客起身到新客坐落，頭尾大約半分鐘。咁既效率，值得上Harvard Business Review。
我一如常客要例牌。但同枱兩位靚女單點澳牛最讚既炒蛋多，飲凍水，顯非新客，但似乎講普通話。入鄉隨俗既新港人？
我讀中學時，有相熟既同窗住係澳牛附近，隔離街有一間負擔得起既冷氣餐廳。幾個人不時約埋去坐。我由深水埗過離，多數行一程，坐一程車。如今澳牛附近幾條橫街仍然食肆林立。
喺澳牛食完早餐出離，行勻附近幾條街，買到衫、食品…，最後再橫過佐敦道去新填地街買餸。
附近的南亞裔也是一個特色。呢次聖誕或者去吳淞街既巴基斯坦咖喱鋪買個羊。
沒有留言:
張貼留言