繼續金秋。陽光靚絕，更冇預告咁涼。要返工既行山友怕好‘抑鬱’。
啲師奶怕湧去M記門口既MIRROR 12子全身大相前祈福：好心俾我抽到你地陪倒數啦！
如果打2針抽一次飛，咁打3針係唔係可以抽多半次？
日前上官網預約第3針。原來要同第2針至少隔180日，我仲差的。咁或者先打流感啦。
世界多數嘢有得解，但也有啲，至少我係唔識解既。
識解既，例如：西非既Sierra Leone運油車炸死過百人。因為以前發展中地區就見過唔止一次：窮鄉僻壤，運油車停係路邊，司機休息、拋錨或者車禍。啲居民湧埋去偷油離賣，偷到一罐可能就夠一家開幾日飯。但有人係旁邊吸煙，咁就一鑊熟。
唔識解既，例如：今季英超如有神助既利物浦同德甲班霸拜仁，點會突然淨吞人5隻蛋？我唔信有人賭波，但念唔到仲有乜理由。
但更不可解既係，美國影星Alec Baldwin拍戲要開槍，點知打出實彈，女攝影師死，男副導演重傷。
拍戲要逼真，但唔使離真係嘛？而家唔係好多道具、特技都已逼真到virtual reality乜？唔通荷里活拍犯罪、動作、戰爭場面，要入肉先算？片場隔離就係急症室、‘小酒店’？
唔通開真槍真係睇得出唔同空槍既效果？
記得80年代Clint Eastwood演‘除暴安良’(要加括號，因為而家興新左，呢種形象係好反動既)既SF警探Dirty Harry，最興用Magnum 44(mm)既大口徑左輪指住劫持人質既歹徒，藐藐嘴咁話”Go ahead. Make my day!”你敢郁人質，我就打爆你個頭！因為Magmum 44既火力，真係可以係打飛人個頭。
今日重拍此片，上映時怕要blackout個畫面，因為冇人敢睇！
Eastwood呢句對白，甚至被當時既總統Reagan攞離‘潤’啲國會議員：意指你地敢否決我既議案，我實玩死你！
新聞話，荷里活拍戲時，開真槍打死人已非第一次。要問點解要用真槍上陣，怕又係美國文化作祟。
立國250年，用武器自衛係憲法賦予的神聖權利，任何人不得侵犯。美國人最寶貴2種個人自由：槍&自用車。前者保護自己同家人；後者讓自己能縱橫全國，不受限制。因此，美國：
1.槍殺案見怪不怪，禁槍永遠冇法過關；
2.討厭公交，唯老弱傷殘會搭。路線梳、班次少，註定蝕本，於是更縮班，惡性循環。
沒有留言:
張貼留言