211102二午雲27°C 67%：港人越嘟越唔‘安心’？

擒日起，為通關，市民被強制‘安心’。坊間嗷嗷聲。承接近年的社會風氣，連捧金飯碗既市民都‘義憤’。

有媒體借機媽叉：〈出行似受刑 街市拍烏蠅 頭破睇急症 都要先掃碼 難為低下層 長者減買餸 學生入唔到圖書館 領館質疑違國際公約〉。

為點讚、為政治，有人嘩眾在所難免。但又的確唔明：連領事都不獲外交豁免，為何機組人員、貨車司機例外？通關重過國交？還是說，而家的富國反正反華，正好還以顏色？

但不止此，聽‘專家’口氣，掃“安心”只係第一步，今後更會擴大追蹤，話唔定跟到你入廁所。750萬人送梗中啦！

講完笑回到正題。有關此疫，昨有驚人的發展。日本最近迅速放緩。當地有研究認為，病毒正因為繼續變異，上得山多遇著虎：近月攻陷全球的Delta最新的變異反過來自取滅亡。有關的報道比較技術性，我睇唔係好明，唔知道係唔係咁解：

Delta病毒的基因突變快。病毒裡本來有酵素/enzyme來修復這些突變，確保其不影響病毒的分裂繁殖。但最近有關的酵素生變，以致病毒突變後，無法再分裂從而絕後。冇病毒可傳，疫情也就自動消失。

聽似too good to be true。但念落又唔係咁冇可能。傳統智慧幾千年前就話：天地萬物，相生相剋。一物治一物，相信也包括自己，自我抑制。世間冇一物係天下無敵，冇嘢制得到佢既，否則此物就滅絕其他所有物種，最後自己也無法生存，因為佢賴以維生的物種也死絕。

這個道理其實背後是說：任何一個物種都不能過份專橫，總會有物種來制衡它，這樣宇宙才能延續。Covid-19、Delta變種亦然。也文也武了2年，全球75億人跪低。但“惡有惡報，時辰未到”。

這並非說，人類坐係度等轉運，而係有千千萬萬人係背後努力，想盡辦法對付病毒，遲早會搵到佢既死穴。

當然，此前全人類都好痛苦，有千萬人失去生命，美國最終埋單可能會過100萬。

因此，我信人類終會搵到制約Covid-19的機制。日本上述的研究唔係天馬行空。