200214五夜21°C 94%：羞家

    晨運被陰雨否決，午飯後散步當運動。
    路過快餐連鎖，見無須搭枱，進去坐了一會。萬一咁啱中招，以此爲據。
    沿途所見，~95%戴罩。華人幾乎都戴，但白人3/4不戴。我猜：白人戴既係港客，唔戴既係過客。後者來自地廣人稀既富國，無本地人口密集的危機感；即便有，也不一定有罩可用。
    但路經舊式家居鋪，見門口有3M盒，用中文寫著”N95”。我差點想致電醫院的朋友，問使唔使買。但冇寫幾錢，唔知係唔係真貨。心想如果街有，友人或者也搵到，算了。
    傍晚6點幾，林鄭開記招重提口罩。只係話用最快既方法、唔係靠價低招標。但冇數量、時間，即係廢話。
    聽咗大約10分鐘，由頭到尾都係技術官僚既語言。領袖只須用一兩句指出政策方向、展示決心、強調法紀、激勵市民，餘下的交給下屬去解釋。咁既communication真係羞家，怪唔得冇人聽話。
    疫情超過個半月，仍然不見黃河不流淚，等到出咗事走唔甩，先離補鑊：
    社會上嘈咗應有10日8日，無可再拖先離話：接回滯留湖北的2,000港人、以及在日本港口滯留的郵輪上港人乘客大約300人。
    與此同時，〈四個紀律部隊明加入突擊檢查強制檢疫人士〉：小學生都知，個一刻決定由入境者自律隔離，就要準備執法。你估750萬港人，個個都係聖人乜？
   同日正好有報道說：〈3名自港抵台須居家檢疫人士一度失聯〉。台方視爲填假資料入境，故意失聯，將從重懲罰。
    近年，香港後生一代視台灣爲同道、擺脫「一國」的避難所。而家都有人損台以利己。我地有難開始發茅，先知自己道德有幾高尚。