首先多謝醫院，今午將近5點，來電「追」我。
我應今晨複診，但：
1.見係罷工第3日。過去幾年去呢間醫院，每次候診大堂都冇位坐，要兩個幾鐘先走得。罷工若每日升級，今日醫院唔知爆到點。如果要等4-5個鐘，怕冇病等出病！
2. 武肺既已隱形擴散，候診時你貼我我貼你幾個鐘，點知有冇carrier？中招自己固然慘，更累家人。
因此，臨時縮沙，希望十日八日後形勢緩和，再致電醫院約期。
點知就到5點，醫院來電，驚我斷藥。我如實講。醫院好明白，問明我手頭既藥仲捱得1個月，即刻俾1個月後既期我。
好多謝呢位姑娘！今日咁忙，仲來電追我攞藥，好唔話得。願上主保佑妳！
其實此前兩個禮拜，已收過當局兩次call。體育場地來電，告知gym班暫停，到時會退番已繳既費用。
政府每個場怕都有幾百人預定。臨急閉館逐個call，都唔簡單。好多謝各位！
林鄭今午宣佈2月8日凌晨起，入境既內地人強制檢疫14日。雖然仍留咗48小時俾人趕落離，而且對疫區人來說，被港強制會好過被裏面強制，好多moral hazard，但總算進咗一步。罷工既醫護即使唔buy，一般市民也順氣的。
林鄭突然「激進」，相信係昨天接連兩日新增3個本地（亦即事主未離港，在本地被他人感染）確診個案後，連衛生當局都話，港或已隱形擴散。亦即呢一刻唔知有幾多冇病徵但會傳染既人係公衆場所出沒，四周既人都有可能領嘢。若此，而家封關都已太遲，今起要全力追蹤、contain病毒。
而家人人都鬧林鄭封關擠牙膏。但擠牙膏有lead和trail之分。Lead仍可接手，但我地衰在trail，被疫情牽著鼻子走。所以我話跟尾狗：疫情行一步，我地跟0.9步。但疫情既步伐大小若呈幾何級數，我地被越拋越遠。
不見黃河不流淚，夫復何言！
沒有留言:
張貼留言