200930三晚26°C 97%：Let's pray for a peaceful Mid-Autumn

港人嘈了幾週後，12走青10.1前夕終於在內地正式逮捕。10人控偷渡，罪成的話1年以下；但另2人控高一層的組織偷渡，罪成起碼2年。

前10人已拘留個多月，運氣好的話，短期內可望解返港，續審原來的控罪，加一條棄保潛逃；後2人怕棘手了。

明10.1網上揚言大龍鳳，當局嚴陣以待，明言利劍高懸。剛才看阿部寬和松島菜菜子主演、東野圭吾原著的奇情刑偵片《祈禱落幕時》，就以片名為明天祝願。國慶不會灑血吧？

以我看，這兩天最驚人的新聞是：美軍無人機部隊臂章是武器壓住的中國地圖。據說，美軍上次這樣做是打越戰期間繡越南地圖。越戰重演應該不可能，但即使1%也夠嚇人。這次恐怕要《祈禱誠心時》。

傍晚，雨勢1小時內由黃到黑。但來去匆匆，很快就靜了。明10.1撞中秋會否掃慶？但若淋熄些火氣，除笨有精。

亞美尼亞與阿塞拜疆為爭奪納卡地區，戰火重燃。看地圖，納卡被伊斯蘭教的阿塞拜疆包住，但居民卻是信東正教(俄版基督教)的亞美尼亞人(與巴爾幹半島的 Kosovo 地區剛好倒過來。)。

亞與阿這兩個高加索國家都民風強悍，注定悲劇。亞美尼亞就更慘，東有阿塞拜疆，西有伊斯蘭大國土耳其，要靠同屬東正教的俄羅斯撐腰。戰事像傳染病，每隔幾年就捲土重來。沒完沒了。

200927日28°C 80%：Shock

今又巧合。清晨與下午戶外伸展，都半途落雨。但雨不大，可照做。雨打臉上，感覺良好。

午後得知日女星竹內結子自殺，比Koby Bryant直升機失事更shock。笑容可恭，多演輕鬆角色。除了離婚，未聞有麻煩事。何況去年才再婚，今年1月二度生育，月前一家三口出街有照片見報。怎會就拋下丈夫和襁褓中的兒子？難道生育後的抑鬱症？

不過，知人知面不知心。May God have mercy.

日劇又少了點看頭。

慶幸自己頭腦簡單，冇咁多想頭，無從抑鬱。多年前在美國，才聽說這個問題。感覺上是富裕社會的代價，發展中的社會比較少見。西方人多，華人相對較少。

當時美國人抗抑鬱，最興服用Prozac。現在好像全世界都用。內地富起來趨於個人後，相信也跟上潮流。

窮有窮的辛苦，富有富的麻煩。

我唯一被美國感染的富裕病是花粉症。第一次去讀書，住了7年都沒有。但第二次去，第一個春天就領嘢。4-5月間，涕淚交流。這在美國很常見，藥房多的是無須處方的allergy藥。除非發到無法生活，或者醫保特勁，才去看醫生。

Allergy在美國是大學問。那時聽說，有五花百門不同的allergy。我對花粉敏感，有人對花生敏感，無所不有。想知道自己對哪種事物過敏，專科醫生會給你打針。每一種敏感有一種針，看哪種會令你有反應。如果醫學上已知有50種allergy，平均打25針應該就能pinpoint出你的問題，從而對症下藥。

當然，打1針就是聽診一次，25針就是看25次醫生，費用靠醫保claim。但羊毛出在羊身上。你如果claim得多，醫保費也會水漲船高。這就是美國私人醫療制度的use and abuse，也就是爲何奧巴馬後來要搞所謂Obama care，加大公家的因素。反過來，現在Trump憎到死，要roll back。

說allergy是美國的富貴病，當然是我不懂醫學亂說。在大陸、香港成長，從未聽說什麼敏感。但在美國，感覺上，有敏感的人通街都係。我第一次去美國，在芝加哥市區住了七年，沒有這個問題。但第二次去，住在大學城Princeton，立即就領嘢。直覺上，兩地的差別在於：大城市相對污糟，空氣冇咁好；Princeton鳥語花香，小橋流水，我從小長在華人的大城市，相對來說就是世外桃源。Allergy的問題似乎是免疫系統的反應。說白了，居住的地區越乾淨美麗，個人抵抗塵埃、污染的能力越弱。

巴西、印度、菲律賓貧民區的兒童在垃圾堆裏長大，固然有不少染病甚至夭折，但成長後抵抗力會較強。在一塵不染的美國小村鎮成長的青少年，動不動就敏感、抑鬱。中國話說，慘綠少年強說愁。

這並非說，要把子女扔在垃圾堆裏成長。但客觀上就是如此。富裕是有代價的：抗逆的能力會較弱。

說回新聞。美國人今後幾個禮拜的頭號人物不是兩位總統候選人，而是Trump提名接替左派女王RBG的右派靚媽ACB。共和黨議員自然會搶在換總統前接納提名，讓最高法院9大法官的左右之比變成3:6；民主黨議員當然力拖，等下屆總統上任再說。這場鬥爭美國人會很緊張。

本地繼續有2項角力：1. 營救12走青；2.記者正名。

1.上面終於公布港青走佬船被捕的經緯度。當然說位於內地水域，信唔信由你。但如果要說服境外有rule of law而不僅是rule by law，確有很多可以改善。

扣留了12港人後，應在對港通報期滿時，就告知港方。如今扣留逾月，經家屬、反對者吵/炒了十日八日後，才來通報，予人口實。此外，內地由扣留到逮捕應有期限，現在超過一個月，合程序否？

港人抗拒大陸，慣性吹毛求疵。但大陸也確有予人咎病之處。

至於記者的鬥爭，good luck.

200926六晚28°C 77%：港青敢作敢爲其來有自

本地確診再次歸零。明周日報復性聚集？周四-日4天長期更將失控？

習：堅持新疆伊斯蘭教中國化。對新疆的政策終於講清楚了。

由此類推，源於中東、歐洲人發揚光大的天主教、基督教，還有佛教，尤其是源於印度的藏傳佛教，是否陸續有來？

上網賣‘戰略武器’的理大一年生原來係爲政治。呢單怕都幾傑。

此案與懷疑棄嬰致死的17歲少女，風馬牛不相及。但共同點是盲目到難以想象。

未成年生育，今天的香港會照顧的。拋棄以致剝奪他人的生命，怎樣也說不過去。

問題是，上面這兩位青少年不時可見，並非絕無僅有。

香港唔喺非洲內陸既小鎮，散發幾支胡椒球槍、防毒面罩..，就有助於擺脫世界第二大經濟體、第三大國防獨立？唔好唔記得，中國仲有幾萬專職網軍，在網上無遠弗屆。你上網既記錄，我估對方早就tag嗮。

這與去年的燒人、界頸等案，幾無理智可言。但去到咁既地步，感覺上唔單係政治問題。

我懷疑，香港‘淪陷’只是這類街霸的導火線，思想的根源遠在回歸前：70年代初起就鼓動青少年率性，“我就係我”、“想做就去做”。說白了也就是自我膨脹，做咗先算，不問後果。

借用西方的個人主義來削弱華人社會父權、師權、政權、財權對青少年性格的束縛，本來有理。但爲了鼓勵個人發揚性格，有意無意地甩開傳統的約制。（港式教育幾時提過“禮”？）40年下來，生成了自由與義務不對稱的港式個人主義。這有點像內地開放改革，經濟奇蹟的同時，副作用可能也尾大不掉。

這再碰上很多人不情不願的97回歸，內地人、資湧港，行爲遠較港人aggresive，令新一代失卻安全感。碰上首位特首naive愛國，與港情脫節，好心辦壞事。更不巧的是，亞洲金融危機、禽流感、沙士....等天災人禍接踵而至，內外交蒸。第二位特首又照搬英治下的積極不干預，繼續放縱地產，令樓價失控。第三位更唔信邪，與民心對着幹。現在的第四位則慣性打得，一如前任自信執着。

可能更重要的是，港第三位特首時，中央對港也逐漸不耐煩，由積極不干預變成積極引導，逐步管起來。這與港式個人主義的中青代，也就勢不兩立。

立會普選一拖再拖，港人不耐煩很可以理解。但反過來，凡事在政治上推向另一個極端，內地所謂上綱上線，與上面也就注定開片。

200925五晚28°C 78%：行大運

今天去北區，西上東落，行了個大運。

巧的是，在友人處重溫了句《聖經》：“我的恩典，夠你用的。”在學時讀過，但早就忘了。

這句話是耶穌說的。他是神，也就是說：他的信徒永獲蔭庇，今生無憂。

不用說，不信的人會訕笑。咁好！咁我信咗係唔係就一世人豐衣足食、家庭美滿，健康長壽...？

但不用說，宗教的話語不能用世俗的眼光去看。信與不信兩種人的鴻溝，不會比政治上的左右、藍黃（台灣則是藍綠）小。怎樣拉近，我不知道。但有些人信，但可能更多人不信，這裡既有先天性格上的，也有後天出於人生經驗的。通常冇得拗，而只能靜下來，捫心自問。

至於我，不但有憂而且多憂。但也正因此，容易感恩。真要悔、恨，總可以找到理由。但看到世間的事，就知道自己已經很幸運。以此角度看，我一直在受恩。希望今後亦然。

回到世間的問題。今疫情本地僅2宗，無頭更0。呢個周末蘇豪、灣仔、尖嘴怕逼爆。接着下周末4天長假，10.1須有節日氣氛。10月下旬反彈輸少當贏。

今日的政治頭條是：小金帝就韓人越境北投，被北方射殺焚屍，向南韓道歉。北韓的內情無法判斷。但表面上，小金帝做得漂亮。不過，涉事的北韓人員就莫問。

就暴動判刑很快就會跌出頭條。更值得思考的是：有多少新公務員誠心宣誓效忠？爲了一家人，當然會照本宣科，但內心真服？

想做就去做，還是說多想一想？〈初生女嬰布塞口棄天水圍垃圾桶亡　元朗中六女生被捕〉。

200924四晚29°C 77%：由疆、蒙蔓延到藏？

疫情繼續位於3波尾。3宗本地，但都有“源”，亦即不明=0。

羅冠聰被推上《時代周刊》年度百人。黃之鋒被起訴，會否更升呢？諾貝爾候選？

與此同時，去年的街霸陸續判刑。有家庭上網賣（不是買）武器，爲錢還是爲政治？

‘陸軍’脅逼，暫時降溫？台駐美代表自稱‘大使’後，外長說，不尋求與美建立全面外交關係。按常理，全面=正式。與美正式建交，亦即要美與陸斷交。太不可思議的事，實則空話。但也可以說台灣聰明：步步推進laap實利，然後講句空話，令人覺得有節、繼續同情。

美國衆院有關新疆出口的決議，no big deal。沒有西方訂單，新疆就靠西邊同族同語同教的一衆斯坦好了。

西方人執着於新疆的‘教育營’，既因爲有過納粹猶太營的人類浩劫，也因爲崇尚自由，不相信集中營有好的。除非逃難，有選擇的話，誰願意全家入營？

更麻煩的是，教育營專收少數民族。營裏若有一半漢人，外界沒有那樣多話說。但中國50幾個少數民族，合共只佔14億人的~5%。現在專門面向這些異語異教的異族，以西方人的直覺，還不是種族、宗教歧視？

我因爲有美國經驗，當初一聽到這個說法，就打個愣。起初以爲地方上的土政策。後來看中央一再反駁西方的質疑，就知道不是。現在再看港大教授的《中国何以稳定》，再也沒有疑問：

中國的成功靠高速發展+社會管控並舉，用中國話說是軟硬兼施，看情勢交互使用；用政治術語說是：辯證法的對立統一；用西方話說是，左手carrot右手stick。教育營屬社會管控，與高速發展經濟同等重要。

兩手並舉、交互出拳，是中國步向世界第一的成功之道，缺一不可，也就是中國勝過西方、發展中地區適用的‘中國模式’。

若此，新疆不會因爲西方施壓，就改弦易轍。

但只怕其他少數民族，尤其是史上有過異心的藏、蒙...也趁西方不滿，接力加入這個非政府陣營。

最近內蒙的蒙古語教學問題，空穴來風。近日更說，藏區可能也會仿效新疆。後者結合中印邊境近月的角力，令人擔憂。

200923三晚29°C 79%：希望小朋友苦盡甘來

家中的小朋友終於有學番啦！dun佢地開心。希望呢一代既小朋友早日苦盡甘來，開心成長。長大後做到自己想做既嘢，也能爲社會出力。

今2宗本地，0不明源頭，近磅了。但下周中秋與10.1同日，周四-周日連放4日。冇得出境放電，只怕報復性聚集。

的確，程序正義，12走青有權自選律師協助。問題係佢地睇中既，不少亦都食緊大茶飯。港青想同律師同堂俯首，定快的回港呀？

日前Trump據報說，對手若當選，會用行政命令DQ佢。假新聞係嘛？實在唔明，但又唔敢係美國白宮、國會網頁留言，怕觸犯國安。望網友告我。

大陸見台灣與美越行越埋，也步步進逼。唔通我在生之年，真會睇到台北總統府重演49年南京換旗個幕？

Trump早就與記者掰面，而家輪到林鄭。記者舊稱無冕皇帝，今後或真喺要加冕。學律師、會計師，傳媒系畢業後，統一考牌，範圍包括公民責任。然後搵工，由僱主代向政府攞牌，每年renew。

近日令人憂慮既唔喺疫情，而係疫情另一面既經濟。港〈保就業11月玩完 引爆年尾大裁員〉、〈新加坡連續7個月通縮〉。鄰近地區相信也好不了多少。唯內地展望有成長。

真喺大裁員，唔止社會氣氛會好差，犯罪都會多的。加上冬天疫情預料翻兜，呢個聖誕新年以至過年怕都係捱。

200922二午夜28°C 83%：問君能有幾多愁

疫情緩，政情接力上。

12港青身陷鹽田第3周。家屬、泛民...升高姿態救人。最新的質疑是：在港水域被內地捉走，並非在內地水域被捕。換言之，內地違法扣人，應立即交還給香港，依港法處理。

看日本刑偵片，警方逮捕疑犯時，口說：“現在是x點xx分，我們懷疑你謀殺xxx，現在逮捕。”

不知道內地海警/公安/武警/海關...逮捕這12名港青時，有沒有大光燈照住，實時錄影，用普通話大聲講：

“我們是中國海警（xx）。現在是xx年xx月xx日xx（24小時制）點xx分，位置是北緯xx度xx分xx秒，東經xx度xx分xx秒。你們乘坐的香港船隻執照號碼xxx號，未經准許，由香港水域進入中國水域，違反中國法律xxx條的出境許可...。現全船人員予以逮捕。”

我估應該有錄影，但念白怕冇咁詳細。縱使愈詳細愈能堵反對者之口，但按內地習慣，詳細到秒的方位怕屬於國家機密，不能公開。

諗得出用12港青被捕的海域誰屬來質疑林鄭，叻！反對者做實事的能力我唔敢講。但捐窿嚹，有咁衰念咁衰既本事，絕對要寫個服字。深知只要市民討厭政府，無論講到幾衰，都有好多人buy，令當局陷於被動。佢點解釋，市民都信佢身有屎。

或者係我睇唔明。TikTok的形勢突然又急轉直下，Trump反價天比高，似乎唔賣盤就拉倒。

我對TikTok毫無興趣，連裝app都懶。40年前係美國，晚飯後消遣，通常睇Sarah Vaughan主持既Solid Gold（金曲）。連人帶狗跌落水笑一餐矇的America’s Funniest Home Video，當時就覺得無聊，唯一既意義係減壓。但我冇stress，因此傻笑對我冇意義。今日社交網絡上既視頻，基本上係呢個概念。

此外，視/音頻係serial資訊，幾乎要由頭睇/聽到尾先知想講咩。透過WhatsApp傳來的，超過2分鐘，我幾乎都唔開。用2分鐘睇文字，得益多得多。

視頻我通常只睇生活性的，尤其是自己適用的老人保健、家居常識。

如果你愛TikTok， good luck.

這兩天最有’趣‘的是：匯控跌破30蚊，25年最低。記得我做工個時，都有過一兩手，就係30蚊價位。但後來懶跟，早就放咗。

匯控落到呢個地步，純屬政治，無關業務：由中美左右逢源，突然反過來兩面不是人，美國罵它放縱洗錢，中國或列爲不可靠外資。

兩三年前個兩句投資打油詩，今天怕要改成：

問君能有幾多愁，冇賣匯控炒咗魷。

200921一26°C 96%：好唔明

傍晚傾盤大雨，落足兩個鐘，一年難得一見。

今2宗本地，其中1宗源頭不明。專家爲中秋6人聚放聲氣，安撫民情。

識IT太少，睇唔明。美方似乎說美國既有的WeChat用戶不受影響。另有人說只要上WeCom，就可繼續用WeChat...。至於加州既聯邦法官暫時壓下WeChat禁令，廢既！加州一向最左，德州反對先算數！

但無論點解，天無絕人之路，則大概是真的。美國的WeChat用戶相信會逢凶化吉。

上周就傳TikTok賣股唔賣algorithm，咁又幾fair。美國怕科技輸華，俾人借番離打自己，有理。中方若禮尚往來，也無可厚非。但如今AI日新月異，algorithm既祕笈，我估一年半載就會俾矽谷破功超越。中方無須自滿。

同樣商業知識太少，似明非明。Trump接受TikTok合共只放20%股權俾Amazon和WalMart，據說因爲仲會捐50億美元俾美國做教育基金。但TikTok似乎又話冇咁既事。

望有識之士教我。

國際上，比較深刻的是泰國學生超激進。要總理下台十幾年前就試過。新聞係在公衆地方，白紙黑字反對皇權。

回港不久後的一份新聞工以東南亞爲對象。這才知道，泰國是全球有規模的國家裏，唯一皇帝近似有神格的。

泰皇雖然沒有以神自居，但臣民真的當神咁拜。因此，凡在有外人目擊的場合，沒有人的頭部能高過泰皇的頭頂。即便總理覲見，也要俯伏在地，爬行到泰皇跟前，親吻其鞋子（或者腳）。而且由頭到尾要躬身俯首，不能直視泰皇。

這比中國古時見皇帝更厲害。中國官員至少三跪九叩後可獲平身，站立說話，甚至眼望皇上。

因此，在泰國，皇帝係憲制的擎天柱，論斷係大罪，更勿論批評、咒罵。現在學生公然在地上釘金屬牌，寫明“國家唔係皇帝”既，五年前不可想象。

當然，問題是當時的泰皇蒲眉蓬深得民心，國人真心當佢係神。但現任似乎被當皇二代，很多人不服。幾十年來常住歐洲，傳聞不絕。即便這一刻，似乎也身在德國，伴隨的是re-instate的寵妃。

這在中國歷史裏有先例。

看樣子，不但現任泰皇保不住頭上的光環，泰國憲制的根本也會動搖。不會走共和，但泰皇會否逐漸向西歐的皇家看齊？

200920日晚29°C 82%：由控疫想到中國模式

確診突飆到23。原來多屬輸入，本地只佔4宗，且都有跡可循。

翻看上海醫生張文宏寫的常識性《说传染》，refresh 內地新冠/武肺1-6月的memory。結合內地出身的港大學者閻小駿，以境外角度看帶宣傳性的學術著作《中国何以稳定，来自田野的观察与思考》，結論還是已知的：內地能在大約2個月內壓下疫情，端靠社會管控。

《中国何以稳定》告訴世人，中國40年來有兩大成就：

1是連續10幾20年的超高經濟成長，世人有目共睹。

但世人沒有看到，或者不注意、不明白，甚至因爲意識形態而刻意忽略的是：

2.政治和社會並未因爲經濟飛躍、人民富起來而像西方眼中那樣，要求更多的自由和西式民主，與政府起磨擦，甚至要改朝換代。

西方認爲，發展中國家政制落後、管治無能，讓人民致富與維持穩定，魚與熊掌不可兼得。因爲人民致富後，必要求自由和民主，衝擊落後的體制。這是社會發展的鐵律，no exception.

但《中国何以稳定》指出，中國偏偏就打破這個‘鐵律’：經濟蓬勃，人民富裕，但社會始終穩定，魚與熊掌兼得。

祕訣就在：社會管控有效。說白了，中共厲害，由頭到尾緊貼着經濟發展、人民的心態，軟硬兼施來調整對社會的管控。

軟的是吸納民間精英，尤其是新富、專業人士（這點港人在英治下應該很熟悉），透過政協統戰...。

硬的相信港人比較有印象：由上到下各級組織無時無刻不關注百姓的心態、動向，善用CCTV、網絡、大數據...。其中特別關注青年、學生。除了日常monitor，一有社會事件、羣衆活動，就用相應的手段，揑熄火頭於未燃。

就中共的社會管控，此書不但明說，甚至以此爲賣點。港人或以爲，這豈非自曝其醜？但目的正在說明“中國模式”的優越性，以發達+管控的辯證法對立統一來治國，向外人推銷。

中共當然明白，它不可能說服美歐改走這條路，但肯定想告訴非洲、中美洲的國家， You have a choice, and actually a much better choice. 

說白了，此書是對第三世界傳播中國模式。

我絕對相信，軟發達、硬管控兩手出擊，甚至像金庸說雙手互搏的作用。世上有不少窮人會願意獻出部分個人權利，交給黨去管控，以換取富裕。問題在於西方人那種顧慮：社會日漸富起來後，在位者掌控的資源越來越多，會否私慾膨脹，濫權、操縱人民，以遂一己之私？這在西方人看是鐵律，合乎人性，信奉的人顯然遠多過信奉中國的一黨長期執政，都會繼續造福人民。

客觀上，中共治國71年，其中恐怕有30年落入西方預言的窠臼。所造成的災難即使在人類歷史上也極其罕見。想說服世人，首先要爲這30年作個交代，讓人相信不會再犯。否則總有人覺得，與日本不肯承認侵華的歷史，同樣難以接受。

要睡了，就此打住。

200919六 晚27°C 94%：社交距離中美最遠

超多大事。誰打頭，看你的立場和偏好。我揀：

1.內地人不能再用WeChat(微信，中式WhatsApp)與在美國的人聯絡。這包括內地出身，沿用WeChat與內地親友聯絡的幾百萬美華。由於內地禁用美國的WhatsApp、Facebook、Twitter、Instagram，內地人今後怕只能退回去，用電郵與美國的人聯繫。但在內地收發Gmail、Yahoo、微軟的Outlook恐怕也有問題。若此，內地人彼此聯繫，怕只能在內地開郵箱，什麼126.com之類。

當然，這只是此刻爲止所知。現在的事瞬息萬變。不敢說特朗普一定不會改變主意。不過，我不會因爲美國有此招，覺得對華很不公平。因爲，如上所述，中國一向不准在華使用幾乎所有美國常用的社交通訊軟件。彼此彼此。

這樣說，並非因爲我是香港人，人在香港，絕少用WeChat，幸災樂禍。而是覺得，政治現實發展至此，已夠荒謬。講離嗮氣。

下一步，是否要Amazon、Walmart...退出中國？內地電腦改用中國自主研發的OS、辦公軟件？

2.中美建交41年來，美台關係接連突破，高官訪台逐步升級，賣既武器越離越勁。衛生部長打頭後，副國務卿訪台今午“完滿”結束。Who’s next？防長？然後Mr. Pompeo親自出馬？但不到50天就大選。特統形勢吃緊。分唔分到心？

殲-機又是否緊隨美方訪台大員的級數，逐步離台海60、50、40...公里？

3.應非巧合，美副卿與蔡英文促膝談心之時，美國CSIS(戰略暨國際研究中心)公開上月18日的衛星照片，正在上海江南造船廠建造的第3艘航母相信再過幾個月就能組裝下水。最終長300米+，與航母1.0的遼寧艦和2.0的山東艦相若。到時會裝備戰機起飛助跑的電磁彈射器。預計23年服役。

日前美方說，中國現在的海軍全球第二。加入航母3.0後，會否只差美國一個馬鼻？

我以往對軍事沒有興趣。但年來南海風雲、敘利亞內戰、小金帝銳武...睇得多。記得買來的二手貨遼寧艦服役最多三四年，就接連自主研發2艘航母。一兩年就一艘。加上中國在電影裏熱衷於戰狼形象、救地球，我係周邊國家都驚。

4.如果你是美國關係人，今天的頭條是：RBG。最開明、最有魅力、身高怕只有5呎的女大法官，以86高齡離世。全名Ruth Bader Ginsburg，猶太裔，紐約人，一生傳奇。到時來弔唁的人，怕有幾里咁長。

但對美國人來說，更重要的是：最高法院的9位法官是總統提名、國會審批的終身職。RBG在時的9大法官，保守5對自由4。RBG離去後，特朗普即使不能連任，也可以做到一月中，或夠時間提名一個保守法官填補空缺。若此，今後十年八年，大法官保守6:自由3一面倒。

但社會上而家因爲特朗普和警暴的刺激，左怒熾烈。到時只怕街上煞唔住掣。

5.相對最小的新聞：安倍晉三不當首相一身輕，今日再次去參拜靖國神社，說明自民黨人心的歸屬。菅義偉若不在位，同樣會去。中國人嬲都冇用。不如慳番啖氣做實事。

6.港聞當然就係：有澳洲籍終審法官告老還鄉，傳聞難頂國安法。此外，昨首次有人暴動法罪成。

記得好似重有的大新聞。但冇做筆記，就此打住。

200918五晚27°C 94%：今天遇到個好姑娘

在廣州讀小學時看抗戰文學。日寇侵華時，據說最興講既中文就係“姑娘”。但中國婦女一聽到就走夾唔頭。

我講的當然不是這類，而是香港話裏的護士。

今晨去檢驗，我俾呢位阿姐4粒半星。語氣、神情、耐性、關切...，俾你既感覺好舒服、好放心。

檢驗前要係手背打‘鹽水豆’（拮靜脈留針頭）。以往拮一次就掂，頭尾只要十秒八秒。但今朝拍咗手背成分幾鐘，先搵到可用的靜脈。我當時心裡有的兀突，擰歪面背”耶和華是我的牧者，我必不致缺乏...The Lord is my shepherd. I shall not want...“。

點知拮入去後，更好似打唔通靜脈，要掹番針頭出嚟，搵過第二條。我只好繼續念《詩篇23篇》。好在第二次O咗，雙方都鬆一口氣。

我阿媽啲式、血管幼，遺傳俾我。但過去一年半，住院頭尾近兩個月，拮過‘無數’次，包括大髀，記憶中未試過要兩回先通，所以從來都唔驚。直到今日。

由此可見，服務分兩面：技術+態度。兩者都一流，當然無話可說。但即使專業遇到阻滯，態度誠懇、盡責，受方也會體諒。反之，若技術與態度相反，受方可能也唔Liky：我欠咗你架？

我而家手背既兩個針口仲貼住紗布。我唔識醫學，冇法判斷今日點解咁阻滯。但睇姑娘對環境咁熟、與同事合拍，唔可能係新任。如果拮親都唔掂，相信早已被調離。只能相信，唔喺佢技術有問題，而係世間偶爾總有的嘢好難解。

希望我唔會因爲今次，以後拮親都驚。但技術與態度萬一不能兩全，你寧可偏邊便？當然，關鍵在差到乜程度。機械木獨但技術純熟，親切關心但技術普通，你寧可...？

箇中的選擇，其實很反映個人的性情，隱約會反映爲政治傾向。而這也正是港人與內地的鴻溝。

睇新聞可知，內地最看重的是經濟繁榮、科技趕美，很少提human value。十年前還宣傳電視節目《感動中國》，近年最火的是《厲害了，我的國》《Mega Project》。一句話，硬件至上。

即便軟件，也主要是商用。微信、支付寶、螞蟻金服...更便捷，更多交易，手機解決一切，全球遙遙領先。至今唔識一掃通既富有地區，包括自稱金融中心的香港，認真冇出息。

但相對很少聽說內地有幫助人，尤其是弱勢，改善環境的apps紅火。以阿里、TikTok、騰訊電游的才智，設計這些apps piece of cake。他們用AI提升商業，方便C2C、C2B、B2B，絕對有理。但有沒有人用AI，讓殘疾人得以自主行動起來？有沒有人apps幫社會上distressed的人舒緩壓力，防止家暴....。

我不是社工，想不出多少human用途的apps。但可信10,000個都不多。希望有幾個能有商業apps的水準。

14億人裏有數不清的奇才。經常有人傳來內地的talent show視頻。有人心算幾十位的四則快過電腦；有人能把你剛讀給他/她聽的文字，倒頭背出來..，還有‘重量級’人物玩雜技，在將近兩米高的滾動圈子上翻騰，奧運選手也不過如是...。

但除了驚嘆一下，這 特異功能有利公益？心算超能或者可以學荷里活電影，爲國安破解密碼。100kg的人玩雜技，或者可以去幫兒童醫院、安老院、匡智之家。More than that?

說到底，特異功能連娛樂都只是過眼雲煙。除了張大嘴巴、拍爛手掌，哪一種增強了你的思維、有益你和家人的價值觀？

世間特異的事，絕少有lasting value。莫說特異功能，即便每年的高考狀元，揭曉時個個都係頭條人物。但從來沒有人問，也拒絕去問，因爲不想夢幻破滅：15-20年前的各位狀元，現在活得怎樣？

我絕不懷疑，盛年的狀元大都是出色的醫生、律師、科技人才...。But that’s it?我會expect多一些，希望他們用本行的專長，對公益有所貢獻。

晚了，要睡了。最後補一句：喜歡看/傳內地科技、基建成就、特異功能的朋友，通常會愛國、重硬件，偏藍。

我出身科技，對科技的作用有興趣。但礙於性格，不崇拜。理由很簡單，借用微軟總裁Brad Smith的書名，我會揣測這種科技tool vs weapon的比重。絕大多數的科技無疑9.5是好的，副作用或只有0.5。但有時候正因爲0.5太小，人人大力普及，最後0.5變成尾大不掉。

200917四晨28°C 91%：張醫生今日走唔甩

大鑊：MP頭版頭標題〈返校童確診 校方：衛署原稱毋須驗〉。張醫生落幕2日後又要重現。

你信？內地〈收藏家油麻地單位遇竊 稱失值40億毛真迹郵票〉。內地多human story，好睇過晚清的《二十年目睹之怪現狀》《官場現形記》。例如：有官警二代殺人，過去十餘年來紙上服刑，娶妻生子；港大有內地生扮公安電騙...。多到睇唔嗮。

但裡面既反對派個個想做文天祥，小市民又忙於自保，《四十年目睹之新氣象》始終留白。

日本多年來的官房長官菅義偉接替首相安倍辭職的空缺。但確冇魅力，會否只是過渡性，靜待真命天子？

「官房長官」聽了幾十年，覺得拗口。看其出鏡，像是美國的白宮發言人，但看舉止又不像。後來想起清末的總理衙門，官房怕即係「內閣辦公廳/secretariat」，「長官」即係主任/總管。

日本以總理最大，「官房長官」亦即中國的中央辦公廳主任或美國的白宮Chief of Staff，相當於中國古時貼身伺候皇帝的大內總管，很多是宦官。由於只有他知道皇帝怎麼說，足以號令百官。美國的部長同樣要聽白宮幕僚長傳達的總統旨意。

新首相謹守安倍路線，圓其未竟之志。對中國來說，最啱聽的是不會加入圍堵。但反過來可信也會與華保持距離，堅守與美的聯盟，何況日中在東海始終有難以調和的差距。更不要說，現在以美、歐爲首的民主國家對華近乎政治冷戰，日本當然不會獨自與華走近。

菅義偉者，姓菅，名義偉。此姓的日人並不罕見，有愛國者竊笑其「奸」。不知道有沒有中國領導人的姓用日文發音，令人覺得其非者。

最後補說日前想起的：當局要對一些港青依法處理或在所難免。但看去年反修例可知，如今的一代率性無限，乜都可能衝去做。除了要防偷渡者海上漂浮（記得文革期間珠江口漂來的五花大綁否？），海路被封，會否有人衝入外國領館？

當年WikiLeaks創辦人Julian Assange被通緝，在倫敦遁入Ecuador大使館，全球轟動。一拖就是五六年，英國與Ecuador都吃不消。

200916三晚29°C 82%：警察有overreact既基因？

在家大太陽，出街dup雨，繼續俾天氣玩死。

確診連續兩日近乎0，林鄭連忙鬆綁3.0。且看10.1會否再貢獻勁爆羣組。

普檢1借人數來開“關”，2以證内地關愛，自然不計成本。但旅遊業係雙刃劍。港人外遊的支出若多過外人來港的花費（例如：日本），總體對方有賺。但港客開心，也支撐了本地的酒店、食肆、零售，港仍有着數。

反之，港人外遊的支出若少過外人來港的花費（例如：內地），港就更開心。

同樣不可忽視的是：旅遊地令遊人喜歡、無味還是厭惡？喜歡則不但食過番尋味，亦會在生活中融入其文化。反之則一次過，感情上會排斥之。

例如，港人最愛遊日，好多人一年去幾次，對日既好感已內化。在港食拉麵怕多過雲吞麵，香港更係日本食材第四大出口地。反之，也好興去埃及。但當地獨沽一味金字塔，文化唔啱港人，更不止一次有旅遊意外甚至恐襲，你會重遊？

全球200多個國家地區，港方首先與日、泰傾開放旅遊，即可知港心。台灣若非撐港人反修例，相信也會是第一批談判對象。港文青好中意台灣，即使冇反修例，也會有人移居。

反之，港府唔喺首先與自己國家傾重開旅遊，多少說明了港情的尷尬。750萬人裏，過去5年未曾北上的，怕遠多過當局谷到盡下，接受普檢的178萬。非因工作主動上去vs唔會上去兩種港人的比例，事關國安，肯定唔會公布。

扯遠了。回到今天想講的正題。港警絕對冇美警個種‘強暴’，但接觸態度不明的對方時，同樣grossly overreact。個位12歲女瘦弱，身穿夏日便服，赤手空拳，除非係知名既搏擊高手，就算真喺示威，全身裝備的防暴警一手就拖低，膝壓在地毫無必要。

美警壓死大隻黑人Floyd、對著另一黑人背部連開7槍，或者會拗美國人多槍，有警員驚青。但港人上街至今未見過槍。國安法生效後，當街出示武器幾已絕跡。防暴警仲使乜如圍捕葉繼歡？

當局針對社運的搜證、檢控也屢予人口實。巴士車長隨身的士巴拿被當武器，聽來也很滑稽。此人即便接近示威現場，士巴拿若像工匠用皮帶綁腰或放在背包裏，應不能算有威脅警員的嫌疑。否則，打工仔和你lunch/shop時，着韓青尖頭鞋，腰繫粗皮帶（有的甚至帶金屬尖釘），手提外賣飯盒附帶既刀叉，都可以控罪。

當局或想嚴控來阻嚇示威，但太冇章法，又或者一年來要處理成萬個被捕檔案，做到發茅，疏漏百出。但這樣只會令市民更覺得，反修例有理過國安。

200915二午27°C 94%：最怕有人唔計後果

連日陰雨，似有利抗疫。少些塵埃、穢物，街上也少些人，然否？

可惜而家係政治上的超進步時代，否則水爲財，可解疫情下的銀包旱。

我就更發。周五依約出門。點知行咗幾分鐘，正當前冇遮擋、後冇退路既空曠地帶，落大水。只好夾硬衝到下一個有蓋處，濕咗大半。記憶中，香港地，通街都係樓，落雨冇瓦遮頭，一年冇一次。

今朝又係。戶外晨運，行咗幾分鐘就開始落雨，只好返歸。個幾鐘頭後，停咗雨再出。點知幾分鐘後又離過。看來天話，今日晨運不宜。

連續3次淋雨，怕10年一遇。水若爲財，我不介意。

講番政治。12逃亡者落入公安手，家屬、泛民/本土、公衆...繼續聲援救人。

記得爆料當天，AD有幅地圖：港沿海好像有3條平行線。最近港的1線之內係港水域，歸港警管；1線與中間線2之間係內地水域，自然歸內地管；2線與最外面的3線之間亦屬內地水域（不記得名稱，或係經濟區之類），換言之，亦屬內地範圍。要越出3線先至到公海，冇得拉！

地圖沒有說1、2、3線海域的寬度，但相信每個不過幾公里。換言之，大飛若避過本港海警，要穿越接着的2線同3線更難。內地有武警、軍隊，追截的能力非港警可比。何況，在港水域被捕，只審兩罪：1.原來的控罪；2.潛逃。但在內地水域被捕有‘花紅’：先按內地法律告偷越國境罪，而且必定罪、唔會輕，以儆效尤。係內地坐完先送番港，依港法辦。

若此，係港水域放生你，等你進入內地水域先拉，都係一種可能。海上有雷達，天上有航拍、導航衛星，驚你飛咩？

唔怕講，我57年夏天跟阿爸由廣州離香港，都係坐大飛偷渡。不過，唔係係廣州出發，而係係廣州攞單程證合法出境，坐夜船去澳門，抵達當晚係澳門內河上大飛離香港。所以，我係光榮出國，冇犯內地法。

當晚既經過至今歷歷在目。半夜上船，大約十零個客，坐係甲板。以普通速度駛離澳門。到公海就叫所有偷渡客落艙，開足馬力。所謂艙亦即漁船裝魚既空格，大約半個人高，人人都要踎低抱膝，咁樣捱幾個鐘。萬一要方便，恐怕都只能默默解決。

大約半夜三、四點，進入港海，放慢速度，客人繼續係艙內踎躉。進入避風塘停定，先可以出艙，分發到幾條舢板，訓到天光先上岸。

避風塘係深水埗，而家海壇街個便，當時深水埗來往中環渡輪個處。咁啱咁橋，阿爸離寄居既啓明書局，係而家欽州街差館對面，行幾步路就到。換咗而家係西貢上岸，天朦光，阿爸連廣東話都唔掂，實俾警察拉。

記得當晚，我完全唔驚，或者係唔識驚。沿途也的確唔覺有風險。只係途中有一次聽船上的人嗌：”有水警呀！”

唔驚，因爲當時呢的旅途，早就打通嗮。後來聽阿爸提過，父子兩人此程好似要俾2,200蚊，以今日計至少好幾萬。阿爸58年尾係香港做第一份工，月薪好似只有150蚊。當時稍爲好景既偷渡客係澳門坐定期既佛山輪過黎，施施然上岸。代價聽講係4,000。

唔怕講，偷渡係我難得的人生經驗，重勁過後來係紐約做幾年‘黑市’居民。因爲，係紐約做黑市居民一的都唔驚。有美國學位、正當職業、美國律師、循正路辦緊移民。何況報館係政治敏感行業。移民局要拉的人多的是，輪唔到我。

講番12人。希望後來者唔好再試。我冇source、內幕，靠睇刑偵、間諜片，從常理出發。而家網上無遠弗屆，無孔不入。你精通網絡，人地係‘NSA’，管理10幾億人既生活數據。敏感人物的訊息、動向、聯繫，怕了如指掌。甚至可布局，請君入甕。

所以，你逃出港水域，反而進入人地既地頭，自投羅網，加碼論罪。值得？

但反過離，又念起個位陳小姐。而家呢一代係自由人權溫室既花朵，理想高過天，常識少過乜；以執着爲榮，以現實爲恥。犯事要拉或無奈何。但要防其作出驚人之舉，尾大不掉。

昨睇娛樂新聞，一日內，日、韓各有一36歲女星自殺身亡。日本既蘆名星，上季才睇佢既主演既劇集。由此想到，最怕有人坐大飛出海，俾人逼埋離時，跳海，甚至除衫跳，Pompeo又大把嘢講。

200914一晚29°C 83%：看Microsoft知風向

疫情連日拉鋸，死唔斷尾。

總結過去8個月的波浪形規律：每次大約收緊兩個月。最後心理、經濟上頂唔順，不得不鬆。但2-3個禮拜後顯著反彈，逼住又再收緊個幾月。如是循環。

而且，全世界都如此，唔係香港獨有。

偶爾過訪全球疫情統計網站，每個國家項下新增每100萬人確診數。頭6名係

1.卡塔爾43,358；2.巴林35,209；3.巴拿馬 23,507，4.智利 22,703；5.科威特22,290；祕魯 22,067。

中東超富的小油國高居冠亞，會否係外勞中招，好似新加坡？但好在大把錢，治療應不成問題，最多係歐洲飛的醫護來助陣。

接著既南美巴拿馬、智利、祕魯或比較棘手。本身不富裕，也可能波及鄰國。再加上南美第一大國巴西的確診數全球第3，僅次於美國、印度。南美國家管治弱，民族性大而化之，隨時可後來居上。

被特統強迫出售美國權益的中資TikTok係Microsoft同Oracle兩個suitors裏揀後者。點解，我唔知，也冇股。但MS日前直指中、俄、伊欲網攻影響美大選。近日恰巧睇專長法律的微軟總裁Bradford Smith一年前出版的”Tools and Weapons, The Promise and Peril of the Digital Age”中譯本。好睇，學到嘢。

美國咁顧忌華爲、中芯呢的中國硬科企（相對於阿里巴巴、騰訊等軟科企），非致其於死地不可，說到底是恐懼中國的制度：黨掌控一切，無處不在。

華爲等中資按中國法律是民營。但中國有上億黨員，任何組織、機構，不論性質、公私，由街坊福利會、業主立案法團、小販團體到萬億的企業，都有黨小組運作。民企日常按市場規律經營。但若關乎社會的安定繁榮，民企裏的黨小組很自然地會上報黨組織，也會向管理層反映黨的意見。民企作爲負責任的單位，當然會遵守。像華爲這種產品遍全球的巨企，黨若對其表示某種願望，管理層爲了國家，當然要comply。

西方爲此會想：華爲這類企業會否被當局要求借業務，爲國家達成某些目的？例如在賣給西方的硬件裏落“降頭”，收集數據、個人資料，傳回中國。西方一旦疑神疑鬼，無論華爲和中國政府如何澄清，都很難釋疑。一不放心，也就寧可封殺，所謂better safe than sorry.

這個道理很明顯。但中國的制度如此，彼此都冇迴旋的餘地。

200913日晚29°C 82%：逃台可死心

鬆綁2.0第一個周末，確診(19)和本地(11)都上揚。希望是偶發的波動。

當局一再拖長檢測，睇樣想谷到近200萬好交差。成本效益的確極低。

香港慣性中式個人主義，靠每人自決執生，最不善全民性的動員，效率低在所必然。

但檢疫1.事關港安甚至國安，冇法子計較成本效益（政治、國防、外交、情報、公共衛生、戰略儲備...最嗮錢，十有九蝕到仆，但冇一個政府敢輕易削減。絕無僅有的中立國瑞士除外）；2.關乎中央對港既關愛工程，唔衰得。因此，針對檢疫的批評無論出於成本效益還是本土政治，都係廢既。

近日既政治game係12名抗爭者投奔怒海途中，被內地截獲扣押，利用港人普遍對內地法制的恐懼，促林鄭接番離，按港法辦事。

我完全同意，內地既法制，尤其涉及政治時，95%港人（包括一的建制派）難以接受。但鬼叫你simple and naive，落入佢既手乜！明知涉及國安，棄保潛逃，但輕率行事，進入人地既海域，變成籠中之鱉。

據報道，這12人當晚分赴西貢布袋澳上船途中，港警就已發現。可信即時已上報內地，在內地水域等君入瓮。換言之，12人由港水域進入外圍內地水域就聽拉。一條大飛，點鬥海警、軍用直升機？12人若知道厲害，係港水域就放棄，讓港警拉，反而唔會咁弊。而家至少要坐夠內地法律偷渡既刑期，先至交番離香港審理。

咁係好不幸。但經一事長一智。唔係我講。呢兩日正好有台灣幫忙「救」港人既記者公開講：打6月起，大陸就港人逃台，加緊收風巡邏，包括好似我估咁，有航拍機巡視。呢位「港友」講到明：1.海路偷渡好難唔俾大陸捉到；2.即便逃入台灣海域，也會像7月被中台方截獲的5港人，長時間扣留，對外失聯，連台灣律師都見唔到。說白了，台方唔想香港抗爭者來投奔。

呢位姓氏用台語拼音Jhong（鐘）既記者慨嘆，助港人有心無力，要求勿再爲此聯絡佢。

但蔡英文既心理又可以理解。2,300萬人，經濟maan maan緊，大陸在軍事上步步進逼，要卯力突破封鎖，點收容千百計既港抗爭者？呢班20-35歲既港人，十有九學歷、事業普通，資金不多，偏向文創，與台灣人既長處重疊。反過來，台灣好忌被大陸人扮港抗爭者混入，做Trojan horse（特洛伊木馬）。

因此，港抗爭者對台可以死心。想走，博去西方啦！放低身段，文創行唔通既，去到有乜做乜。先自食其力，爭取人地敬重。最衰係俾人覺得靠政治本錢攞救濟。香港就大把呢種外來人。

200912六近午31°C 71%：一本罕見的書

微雨无法晨操，只能在户外行两个圈。

我从未养狗，昨晚竟做梦带狗出街。长耳垂下的品种。但冷落了它，它垂头抗议。

以往唯一与狗同住，是来港初期寄居书店时，店里的后生（职业称呼，类似学徒）养的。我从广州来，父母城市世俗，不沾花鸟虫鱼。来港后自然也不爱与狗同居。只接受店里的猫，因为治鼠。

成年后，也从未有养狗的家境。后来见人放狗，深感其灵性。

重头来过，我可能会养。但在今天的社会，深知要照顾它一生，责任可能大过宠爱。

有人在户外捡来两只弱小的白狗，照养一生。其中一只病危时，主人感觉到它要告别，找棵树让它安息。主人信藏传佛教，一两年后，感到小狗要回来，去树下见它。小狗除了再见主人，大概想接走衰老的同伴...。

早餐后翻书网，见到一本罕见的题材。全球75亿人，兴趣无奇不有，再怪的题材都有人写。难得的是怪得来有意义。以下是此书的简介：

Molly Guptill Manning - When Books Went to War当图书进入战争

二战期间，纳粹在欧洲焚书，美国图书管理员闻讯，组织“胜利图书运动”，募集了2,000万本精装书，送往国内外的军事机构。但数量、种类满足不了士兵的需求，笨重的精装书也难以带上战场。

美国图书协会为此与美军展开“军供版图书”项目：为参战美军提供小巧的平装书。至二战结束，累计有1,200种合共1.2亿本军供版图书。等待诺曼底登陆时，在太平洋地狱般的战壕里，在医院、出勤的轰炸机上…都有士兵阅读。还给作家寄去读后感，很多作家也认真回复每封来信。

于是，The Great Gatsby火了起来，A Tree Grows in Brooklyn的作者Betty Smith成为全民偶像…。军供版图书推动了平装书革命，使阅读的习惯从知识分子扩展至全民，创造了新一代的读者，帮助欧洲出版业浴火重生。

作者Manning本职律师，著有The Myth of Ephraim Tutt等，作品多见于The Columbia Journal of Law And The Arts等刊物。

200911五晚29°C 81%：特朗普聰明一世

晚飯後失算，荒博2天。

疫情繼續「低波」。今9.11表現最好：唯3宗本地，餘多屬新抵埗菲傭。

外傭風險的確高：與僱主同住，貼身照顧老幼，全家食物、衣物、清潔衛生無不經其手。一人感染，全家連坐。是爲富裕社會舒適生活的代價。

今鬆綁2.0。除非明顯反彈，否則下周非3.0不可。到時又會小型爆發。

近日疫情既明星係：法國一日近萬，印度一日近10萬。後者相信月內就會超美。

這次的疫情靠全球化散播，越有錢則出國越多，散播越快。窮人困係本國，要到移居富國的人從富國回流避疫才開始，因此遲一輪。

但窮國醫療弱，加上人們要糊口，寧病死好過全家餓死，一爆疫就好難剎。

因此：人傳人的病毒，富國帶頭，窮國後進。

但非洲好在人口密度相對較低，否則不堪設想。

美國近日的焦點轉移到1.好恨連任既總統有冇機？2. 西海岸各州空前山火，三藩市遠看仿似科幻片的地獄。

1.特朗普聰明一世，笨極一時。Bob Woodward與Carl Bernstein 72年係WP拉共和黨總統尼克遜落台，我係留學既宿舍幾乎晚晚睇TV晚間新聞。擺明係自由派記者，特朗普咁鬼右，話明與主流媒體勢不兩立，點會長時間俾佢錄音訪問？以爲自己係神，閻羅王都tum得番？抵輸，冇人可憐！

美國媒體爆料理所當然，所爆的也十有九係真。關鍵係投票前個幾兩個月黎爆，擺明係踢特朗普走。你唔能夠怪記者偏心，記者本性liberal，在公在私都會咁做。性情保守既話，通常會做的穩定、高收入既工，會計、金融、工程..。係個的想監督權貴、踢爆衰嘢既人，先會去做記者呢種無時無刻、走dek被人噴到一面屁、收入微薄既工。

日前爆出特朗普鬧陣亡軍人loser，以爲係近事。原來係兩年前訪法時說的。早唔爆，留係而家離爆，司馬昭之心。

當然，特朗普團隊也會爆Biden幾十年前既嘢，真真假假。

2.美國西岸既山火，南起加州北部，向北經Oregon州直到美國西岸最北的Washington州。據說規模前所未有，BBC說懷疑arson。我第一反應係：與選舉有關否？

感覺上，特朗普救火叻冇乜着數。西岸係最liberal既，liberal到saai票。美國大選，選民票分州點算。你係A州贏一票就贏嗮A州所有既electral vote(選舉人票)，贏99.99%票都係贏同樣咁多EV。但西岸左，加州、Oregon、Washington相信近七成係投俾Biden，但多出嚟既選民票唔可以分俾保守州既Biden fans。因此，西岸咁liberal係廢既。

若此，特朗普唔會賣力同西岸救火，因爲反正你唔會投俾我。拜登會鬧特朗普救火不力，但冇用，因爲西岸選民本身就憎特朗普。

所謂arson當然係刻意既，but for what,私人恩怨，反對西岸？

美國爲何山火這樣多。歐洲好似少好多。因爲人口密，沒有這許多森林？

講番本港，反修例期間，陳小姐裸屍海上既原因傾咗幾個月，終有答案。但與任何人睇一分鐘新聞既反應無別。法律就係咁一回事。

但當局的確欠市民一個合理的解釋。雖然，社交網絡令個人主義極大化，一樣米食萬樣人，而事主懷疑情緒不穩，但我睇咗幾年刑偵劇，未聞有人會除嗮衫自殺。如果有露體癮，上網出po就得。海上浮沉，冇人睇到架。

憑常理只能話，唔係自殺。但問題係，事主多少涉及社運，因而直覺上成爲反政府/警暴的最佳素材。

不怕說，我唔信當局敢因爲其涉及社運，整死佢、性侵、掟出海以報復。呢個政府無論點仆街，與希特勒、非洲軍閥仲有好大段距離。我相信，即使以內地既强力，都未夠膽去到呢步。

你信，我只能話你叻。我太蠢，只能排隊等見上帝，唔好阻香港社會進步。

200908二晚27°C 88%：香港最終冇得留低--馬克思鐵律

今確診繼續<10（6還是9純屬偶然，無關宏旨），疫情確放緩。當局立即預告周五再鬆啲。食肆每枱4人小事，開放主題公園大事。

再看當局忙於與外國斟旅遊泡沫，原來，谷檢測係借你同我既陰性離要求外國開放旅遊。救經濟固有需要，但免費檢測看似錫市民，實則用我地做談判籌碼，唔好話唔功利。

主席先生今日嘉獎抗疫英雄，鍾南山的獎級最高。但在香港看，毫無感覺。鍾大國手呢次都幾失分，唔再係SARS時既內地英雄。

政治上，泛民繼續炒三權分立、立會走定留。我日前話庸人自擾，因爲係三權呢個問題上，內地同境外從本質上對立。只不過雙方都唔講明，大家呃大家。

境外堅持三權分立，因爲從西方角度：人性自私，當權就必濫權。因此，選民委託在位者代行公權，必須同時用盡方法來防止其濫權。方法就係用立法（議會）同司法（法院）離check 住佢。一方面立法限制其權力，與此同時由法院𥄫實，看是否偷雞濫權。

但中國剛好反過來。共產黨深信：資本主義與社會主義勢不兩立，有你冇我。馬克思更預告：共產主義最終必定消滅資本主義，人類最終的天堂（中國古時憧憬的大同社會）係共產社會。目前社會主義的內地和資本主義的香港並存，只是過渡性的。假以時日，內地必定會同化香港。香港改行社會主義，最終同內地融合，走向共產主義。

內地的社會主義爲了向共產主義邁進，消滅資本主義，不能好似資本主義社會咁，三權分立，互相制衡（大陸叫扯皮，互相拖後腿），而必須將權力悉數交給政治上最先進的共產黨去運用，以最快的速度建設社會主義，最有效地打擊資本主義。

   因此，社會主義的三權，必須由行政主導，立法和司法聽黨指揮，爲強化行政而出力。說白了，社會主義的司法只是鎮壓反對者、維護社會主義、打擊資本主義的工具。絕對不能與行政並立，分庭抗禮。同樣地，立法是爲行政充分發揮其權力以建設社會主義、打擊資本主義而設。行政需要立什麼法，議會/立法者就照例通過，而且要全票，以示全民擁護。

所以，與內地爭辯三權係雞同鴨講，攞離搞。

但港人迷信法治，病入膏肓。冇得拗。

我就訓啦！

200907一晚29°C 83%：好考人既體檢

      今日既體檢好考人。連續俯臥45分鐘，唔准郁。期間多次先吸一口氣然後呼出，接著閉氣，短則10秒，長則20秒。閉氣期間，只要稍爲震一震，就作廢重來。我算忍得，好似都衰咗幾次。

      最辛苦唔係唔俾郁，而係難透氣。手術平台唔似人地按摩牀，頭部開個窿，俾你俯臥時呼吸。因此，開機前，面部就要揀定側左或側右離透氣。但唔係個個都練過工夫、瑜伽，個頭側唔夠角度，側面個邊個鼻窿，其實壓住係枕頭度，只剩另一邊既鼻窿可透氣。一個鼻窿一啖氣要頂20秒，反覆十幾次。每做一次，感覺到吸入既氣好似越離越少。咁樣捱9個字，其辛苦可想而知。

       醫護最後話做完啦，起得身時，發覺側面個邊隻手伸唔直，好似扭親咁。要郁番一兩分鐘先至回復正常。 

        但我好感恩。好在每日晨運，有練呼吸，否則怕仲難捱。懷疑兒童、老弱點做，是否要用其他方法檢驗。

       擒日9.6國安後最大遊戲拉咗近300人。搜證、起訴、庭審、輿論....又有排玩。

       睇刑偵劇多年，發覺北歐最好，西方國家最渣係美國。唔喺荷里活唔得，而係美國人唔中意或者唔耐煩推理。罪案劇通常賣動作而非賣腦。

       咁多年，要我揀最鍾意既：冰島《Trapped》；英國《Vera》；英國《Shetland》；瑞典、丹麥合作既《Boen橋》。

       其中《橋》更獲英與法、美與墨、星洲與大馬合作翻拍本地版。因爲：所謂橋係指貫通兩國的大橋，橋中間兩國的領土分界線上發生離奇命案。記得本博講過，呢個題材唔能夠用港珠澳大橋離翻拍。唔止政治唔正確，甚至有違國安。

        呢兩日撞到部北歐劇：挪威既《Wisting》。頭5x45m講一個故事（一個案），睇到放唔低。而家通常11點就訓，但個晚追到00:30。

       睇北歐劇除咗睇戲，我也特別關心語言。想知道不同的語言之間有多少相同之處。發覺冰島語對我完全無厘頭，大概只聽到”Pa”（爸）之類。但個日首次看波蘭劇，仲離譜：連讀字母都幾乎冇一個同英文近似。

      我除咗英文，在學時爲了畢業，讀過3個禮拜法文、4個禮拜德文，都係intensified course。一周5日，每日上午上堂4小時，下午夜晚自修死背。一個月下來，睇得明短篇小說經典。由此多少知道，英、法、德文之間的同與異。但如今看波蘭文，幾乎冇個音節係聽得明既。

     最奇既係，波蘭明明喺東歐，與俄羅斯爲鄰，但發音與俄文/Slavic語系幾無相似之處。由此記起，波蘭幾乎四面八方都係斯拉夫民族的國家，但唔信東正教，卻九成人信天主教。要Google下點解。

200906日晚29°C 79%：極左派會否保送Trump?

     確診突然又飆上~20。睇多2日，希望純屬偶然。

     今9.6原來有久違了的街霸遊戲，要討回被「DQ」的立選。國安法生效2個多月來，似乎首次咁大陣仗。雙方相信已做足心理準備，且看埋單有幾辣。

     專家話林鄭已就疫苗落單，足夠俾三成市民。但冇講產地。如果係上邊，怕三成有多；係西邊則肯定唔夠；北邊既又怕好多人驚驚地。

       呢種病毒睇來幾麻煩：1.好多感染冇病徵，即係行得走得既毒彈。2. 病情唔重唔難醫，但似乎會搞到你孱。3.抗體只有三幾個月，此後仍可再翻兜。4. 病毒似乎善變，好適宜人體內的環境。

      本月內，相信全球死亡會突破100萬，其中美國20萬，印度可能也夠10萬。

     如今番睇，03年SARS雖然死亡率高，但論傳播率，只係局部地區性驟雨。呢次既武肺先勁：去緊8個月，全球叫苦，重未見盡頭。只怕夏去秋涼冬又至，戴埋口罩又過年。如果團年、開年每枱限2人，認真夠韻味。人一世物一世，不枉此生。

     日前民調話Trump首次反超Biden。餘下呢55日，美國人緊張死。但以我睇，Trump想連任，trump card在極左派之手。佢巴不得爆多兩單警暴，等的左仔左女好似香港咁，勁打街霸，激起中間選民求law and order，寧要強人唔要好人。

     Trump過去呢個幾月精咗：只打中國，唔再亂噏，果然收番的失地。Biden 肯定會打醒精神。但只怕啲極左黨友倒米。

200905六晚29°C 84%：「二人令」聽日怕冇人理

   想早上八點寫，但總拖到晚上八點後。日間交替着睇書與劇，放唔低。

   日劇《家政夫》演完了，有爲靚女與老20多歲的鐘點家務助理結婚。雖然勉強些，但演得好，夠好笑，符合社會的良好願望。

    劇迷等《半澤直樹2》大結局，但我等的是《Suits金裝律師2》埋尾。前者獲熱捧，因爲俾打工仔出氣，媽PK上司。我冇此需要，也不覺得現實，更鍾意睇後者的office politics和訴訟雙方比牙齒。

   此前看了部英劇《The Capture捕捉真相》，很震撼。一句話：如今CCTV無處不在，實時錄影，犯罪無所遁形。Really？呢部6x45m的劇集想convince我地：只要控制了CCTV，甚至可「實時」演戲造像，難分真假。

   邊個咁大膽？呢部戲很有意思，政府、左派各打五十大板。首先係反恐當局，查到有人準備犯案，及時逮捕。但上庭時證據唔夠solid，於是用前後差幾秒的CCTV影像玩剪接，睇起離幾個嫌人聚埋，攞架生開工。法庭深信不疑。

    反過來，接着玩得重勁既係人權組織。有人滲入政府，有權管理CCTV。借一個被告在阿富汗殺害平民勝訴的英兵，用模特兒排演戰場英雄當街綁架靚女律師，繼而性侵殺人的街頭影像。公衆同樣深信不疑。事主百辭莫辯。人權組織目的係借呢個「人渣」英兵來反戰。

    當然演到尾開古，CCTV影像原來係咁樣打造既，事主總算沉冤得雪。此劇對香港有現實意義：反修例民字同愛字各走極端，搞宣傳各出奇謀。但唔好淨係鬧人五毛，睇連登既影像同樣要用腦。民字多文化人，興起上黎，乜都創得出。睇8.31烈士倫敦復活後的偉言，一位女公務員宣揚殺警...年輕一代的思維先進到非常人所能了解。我這一代，真的老而不死是爲賊。

   至於疫情，今維持在~10價位。明周日街頭、山頭實逼爆。羣聚「二人令」執法難矣。

   太多事想講，但《聖經》話齋，「肉體卻軟弱了」

200904五晚29°C 83%：庸人自擾

    確診略超10，但與8、9之差純屬偶然，放緩之勢不變。若此，下周一相信就會進一步鬆綁，例如4人一枱，重開gym、圖書館等公共設施。

   爲議員留vs走搞公投、爲三權分立爭辯，背後的思維是法治這條sacred cow。港人深信，法治係抗共的銅牆鐵壁。但以我看，玩公投、爭三權，實屬庸人自擾。

   建制才懶理你地留定走。留則唔夠票，得個嘈字；走則好行夾唔送，建制自己玩，開心得多。

   至於三權分立，英治下，港督無疑高於立法、司法。立法局幾時推倒過政府？香港唯一最接近英式民主精神既係：政府預算非經立法局通過不可。這或許是泛民一度想攬炒預算案來拖垮林鄭的理由。

    No representation, no tax係英國的憲制傳統，後來爲北美殖民地點燃獨立的火炬，成就咗最偉大的民主國家。但呢句話唔適用於香港。冇錯，港區人大唔係開放選舉既，我地可以話自己係北京no representation。但反過離，北京都可以講，我都冇抽你地稅啵。彼此冇拖冇欠。

   再說，中共從第一天起就係黨天下，立法、司法講明是黨的工具，按黨的意旨來執行立法和司法的職能，並非獨立於中南海之外。所以說，人大選舉、開會，拍拍手，舉舉手就勝利完成。至於司法，就更是黨鎮壓反動勢力的工具。你幾時見過人大卡行政當局？更不會有人到最高法院控告國家主席、國務院違憲...。

    若此，香港作爲這個14億人社會的下屬行政單位，有可能像英、美那樣三權分立？老豆係《大紅燈籠高高掛》裏的老太爺，但其中一個仔係美國hippy，長期共處一屋檐下，可能嗎？

    現實中，唔喺個仔出走，就係被老太爺軟硬兼施收伏。現在不就是有人要出走，而老太爺也日漸收緊緊箍咒？

   晚了，打住。

200903四30°C 80%：8.31復活與阿侵反超

    確診連續第二天﹤10，但源頭不明仍佔~50%。明起鬆綁在所難免，但食肆每枱由2人增至4人會比較中庸。我也期待中斷既gym堂可快啲補番。

   昨晚臨時cut off，未講2樣很重要的事。

  1係有8.31義士在倫敦復生。耶穌當年爲了拯救我地世人，死咗3日。而家香港鬥士爲咗750萬人，死足1年，辛苦過耶穌N倍！Halleluja!

   當日應不止1個人犧牲。爲了維持社運的動力，祈望其他的義士繼續死落去，革命成功前唔好復活住。

   2是據美國Democratic Institute民調，近月民望一直落後於對手Biden大約10個百分點的總統阿Trump，近日反勝3個百分點。理由是：反歧視示威太勁，民意開始祈望law and order。

   說白了，警察處事不當則爭平權；一旦爭到頭崩額裂，就又轉頭求穩定。

   美國如果真颳右派翻案風（中國文革術語），造就Trump多4年，世界就真喺大件事。且看上街打倒帝修反的左派、黑紅族裔，會否急剎車？

   今日最聳動既新聞係：去年美國收入最高既荷里活大隻佬Dwayne Johnson全家確診。全球身價最高的足球員PSG尼馬，仲有曼聯王牌普巴...也同病相憐。

    六塊腹肌照樣對冧，可見病毒之勁。我呢種老嘢竟得以倖免，真係要thank God。中國俗語，閻王要你三更死，誰人敢留到五更。

   迪維莊遜和普巴最終梗冇事，只不過要係病房捱十日八日即。

200902三晚30°C 81%：鬆一鬆，反一反，如是循環

    连续第二日<10。雖然Unknown origin 50%，遠不如昨日，但市民心理上怕鬆咗3、4成。呢輪鬆綁反彈幾多，月尾就知。我估會上番20零。

   我信專家話，秋冬會係新一輪（季節性，氣溫決定，唔同鬆綁後反彈）。但香港10月中先涼，11月中先入冬。可以鬆綁既時間好短。有排捱。

   全民檢測谷極都唔上。大官發茅，借遊日來裹挾市民。真喺想借旅遊離sell檢測，都用祖國既錦繡山河啦！國安法下，挾外力以自重？

   今晨早醒，提早晨運。個鹹蛋黃好靚，暖而唔㷫，對正佢深呼吸（但懶帶手機，冇影到），人都精神的。

    起初以爲時間早，所以太陽特靚而且唔辣。後來轉朝北拉筋，發覺天色hazy。鹹蛋黃怕係陽光穿過薄霧形成的。冇霧時曬到身好㷫，甚至laat。

    今日終於等到《Suits金裝律師2》更新。織田裕二扮沙塵精英律師好有型，中島裕翔夠靚仔鬼馬。配小手伸也的搞笑，律師樓兩個靚女中村杏、新木優子的風韻，夏季日劇，呢部最啱我。

   年來的刑偵日劇好routine。本季日劇，反而意外地喜劇《家政夫渚先生》啱睇。多部未華子kawaii(角色，唔淨係樣)，大森南朋做戲好。家政夫係日文，直譯男管家，實則計鐘既家務助理，上門煮飯、洗衫、執拾，唔喺豪門住係屋企既butler。

    多部工作狂，屋企好似垃圾缸，食飯靠便利店。喺家務助理公司打工既家姐好心，幫佢搵同事上門打掃煮飯.The rest is history...Sell日式服務的體貼，無所不至。華人文化唔同，學唔到。

   今晚到此爲止。突然有事，明天再說。

200901二晚30°C 79%：8.31 2.0，好！

   去年8.31被暴殺的義民，周年忌辰剛在倫敦復活，港就變本加厲：當街打孕婦、噴胡椒。母嬰暫時安全，但點知冇後遺症？今世有咩事唯PK是問！

   8.31如今已連續2年，足證係港殤日，今後每逢這天就在全球各地紀念。

   昨在美國LA揭幕的港人抗爭塑像完全正確，香港確係搞緊法國大革命。邊個係Louis XVI和Marie Antoinette已很清楚。Robespierre、Danton, please stand up!

    今日既確診只有1宗源頭不明，擺明係同上面夾埋離開關，放多的人落離，取代本土既義民。這與借全民檢測放的專業人員落離，是同樣的陰謀。最終係踢走本土既醫護，將公共衛生大陸化，從而控制我地750萬人。

   

    OK,連登式「創意」發揮過，講番真既。檢測首日，我也趁機外出飲下午茶，兼買餸、飛髮。滿載而歸，但火龍果加幾隻牛奶蕉好重，孭到死死下。但孭得本身就好感恩。終有一日孭都孭唔起。Thank you God!

    久違的下午茶檔，乾牛河仍然夠火候，而且平通港九。但今午好少人，坐落壓力少。過幾日再去嘆星米。星米雖然冇初初咁好，但仍算可以。

   檢測既服務，以我所在地點的經驗，就認真麻麻。食晏時間原來鎖門。下午重開既第一批人，早到既話罰企，門口冇蓋冇櫈。而且，開門唔準時：我數住，遲大約7分鐘，門口多過10人。食晏理所當然。但唔可以留兩個同事係度，開門讓先到的人入大堂坐住等？

    14:20到，前面大約有10人，到走得係14:55，頭尾35分鐘。場內工作人員，一眼望去至少比來檢測既多一倍。20人伺候10人，要35分鐘？又唔喺睇醫生，把脈、聽肺，問病歷...。總之，leave much to be desired。

   但此役很值得。多少明白了，香港彈丸之地，300萬人投票，爲何要翌晨天朦光才點完。人地美國成個中國咁大，大選1億票+，絕大多數午夜前就已得出結果，白宮新主人凌晨就已declare和發表當選演說。當然，我地選特首遠遠快過佢地，投票後通常1個鐘就已揭曉，甚至未投票就已可以去飲茶。

    今午的經驗，多少證實了我對香港制度的「偏見」。個人有效率，但一到全港規模就死梗。但這正證明我地港人政治上正確：我地反集體由心反到出骨，同大陸剛好顛倒。佢地係呢方面咁叻，因爲係totalitarianism(全能主義)，我地係完美的individualism。水火不容，唔使指依融合啦！