221117四晨陰24°C 79%：0+0出局. What's more creative?

    呢輪病毒好頑強，死都唔斷尾，本地確守係5-6k應有個幾兩個月。粗略計，你我每日有0.1%的風險中招。
    但反過離睇，七欖連日萬人同場脫罩歡呼冇爆疫，重症、死症也冇點增加。對疫情是否可改以平常心看待？共產黨話齋：蔑視之！
    當然，蔑視既先決條件係盡人事，打足針（最好等聖誕後打埋最新的二價苗），生活正常，做下運動，避免濫用免疫力。
    反過來，若有中度的慢性病，例如糖尿，就不能加入蔑視的陣營，要繼續步步為營。
    我自問唔係有spirit的今天一代，離離去去都係個句：盡人事，安天命。
    最後再加一句：多求己，少怪人。
    特首日前就0+0的話題落閘，隱約道出難處。
    本來死推0+0的建制中人終於明白：That’s politics, stupid（出自前美統Bill Clinton）。說白了，顧及內地的感受。
    我估錯好多嘢，但今次總算「撞啱」（見週前博文）。
    講到底，14億人努力「清零」，輪流封控，729萬人若大張旗鼓0+0，講唔過去。

    內vs港有差距，係百五年來的歷史遺留問題。但港人慣享著數就算了，而家除非你唔承認同上面係一家（咁就不如遠走高飛，無謂彼此眼冤），否則兩兄弟，細佬有得歎，大佬有得呻，又點能夠同居一屋簷下？
    港人慣咗百五年英治下對「內」享有的優越感，幾乎以為自己天生叻過河北，享有特權理所當然。精仔袋咗著數唔出聲，甚至扮窮。蠢仔攞著數理直氣壯，唔識得感恩，仲要踩人地，最終一拍兩散。中國話話，敬酒不飲飲罰酒。

    唔怕講，國安法就係咁離既。以前去到盡，所謂挑戰極限。全球拍掌，威到盡。而家反過離，好多嘢都唔做得唔講得唔睇得，更有人要入冊、流亡，搞到大家都好冇癮。自己攞離既，You want, you got it!