220207一年初七人日傍晚17°C 87%：冇得阿G阿Jor

初四、初五～350，以為可望見頂。點知初六飆上600，原來o毒仍在發威。明後少則900，多則1200。病床、隔離營日內就爆棚，怕只能居家隔離，但又必將傳俾家人，唔通要逐家禁足派飯？

但放眼睇，香港又唔係咁恐怖。人口～港3/4的新加坡，前兩日接連過萬。人口～港x3的日本東京都，昨1.2萬。

有人會話，這是新加坡與毒共存的後果。但念深層，人地可能係冇法子。

新加坡係國家，富過我地，但面積細過我地，食物、日用品全靠入口，連基層勞工都來自大馬、南亞。大馬邊境城市新山的工人就像珠海人去澳門番工，每日出入新加坡兩次。封關的話，可能連垃圾都冇人倒。

反過來，中上層有大量主要來自西方的金融、企管精英。你靠佢地搵錢，強制的話，佢地就向BBC、CNN投訴，用國際化離壓你。新加坡本質上靠全球化致富，惡唔起。

總之，一眼針冇兩頭利，有著數就要承受其副作用。

香港雖然一如新加坡係彈丸之地，但隸屬中國，上面既疫情俾零容忍既抗疫路線閘住，香港得以「獨善其身」。但反過來要閘住「國際化」部分，以致幾百萬與共存世界有關係的市民嗷嗷聲。

今日最重要既發展其實唔係飆上600，而係中央首次講明：香港必須走清零的路，與全國一致。言下之意，唔好再阿G阿Jor。這相當於古時的御旨。 今後唔好再以為共存係option。

最後就昨日的博文follow up：那位中國網球女成為全球新聞人物後，首次見西媒，說自己從未說過被性侵，也從未失踪，現已退休。 祝她生活愉快。