220204五晚14°C 65%： 多謝今朝既姑娘與醫院

術後將近10日，靜止時唔痛，但曲身、轉身時，似乎觸及某點就會痛，程度輕則3，重則5。縱無礙起居，心理威脅大。去醫院拆線時問，一般會痛幾日？姑娘話人人唔同，答唔到你。

我算忍得，但呢次傷口日常就痛，拆線前好擔心，連日默禱。

今朝一瞓上手術牀，姑娘就發覺，傷口既膠布黐得好實，要用液體處理。聽來好似話，膠布溶係皮膚度，要用液體處理過先揭得起。我讀化學出身，要消去緊附的物質，酸液最有效。但酸不能用係皮膚度，可信有安全既代用品。我倒吸一口涼氣。好在姑娘輕手郁咗一兩分鐘，就無痛解決咗。

接著係戲肉。姑娘出手前話，覺得好痛既話，請示意，俾你抖抖。我更擔心，必要時屏氣咬牙。與此同時安慰自己，睇過醫學史，古時冇麻醉開刀甚至截肢，死亡率高到二分一，自己只係小兒科。

姑娘「埋頭」苦幹。我眼望頭頂德文品牌既手術燈，心中默禱，感到皮膚上有輕輕既掃動。一兩分鐘後，有一下近似拮針既感覺，以為離啦。點知，剛做好心理準備，姑娘就抬起頭話，拆嗮啦！埋咗口啦！但暫時要再黐塊膠布，三日後先至撕...。

咁輕keng既？仲以為聯咗幾十針，掹番條線出離會好辛苦。Hallelujah!我連忙多謝姑娘好手勢。

近幾年，光顧過呢間醫院不下十次，其中三次係小手術，所遇到既醫護都好關切，作為病人感覺良好。我將近100歲既阿媽最近都由安老院送過入離。希望上天俾我復原後，仲有能力離做義工，回饋社會。

God bless 照顧過我既各位醫護、阿姐阿哥。