130721二晚 21°C93%：「澳洲」喜見「鄭君綿」

   留意了很久的一種產品昨終有售，但買家留言6正3負。今晨去尖沙咀hands on測試後覺得，其頭號賣點其實靠削減另一種用途來達成。用家著唔著數，視乎使用的習慣。我暫時hold住再睇。

   「功課」做完，順路行彌敦道兩側，為小親戚慶生張羅，無功。下午茶時分，行經油麻地的茶餐名店。門口冇人排。近水吧的四人枱，食客更剛好起身。
   雖然很飽，但路過冇龍算有緣，親下本土啦！
   過來招呼的竟然係最熟口面的「鄭君綿」。但我轉數慢，落order時兩連衰。

   先是慢我一步坐在同枱的男士開聲，落單熟，老行尊依例先接。我收唔住口變「兼」隊，被叫閘住，等人落完先！
   接着輪到我落，連噏幾道餐扮內行：「通粉、炒蛋、熱奶茶」。點知被人厲著咁話：「唔講餐茶既！麵包定多士？」原來衰在：第一道餐漏料，最尾個道餐茶又唔識規矩，食完正餐先離嗌！

   被兩連窒，知醜仲點敢出聲！但幾分鐘後，老行尊行近我左後方的枱落單，竟反被個面圓圓既中年女士笑笑口地淤番轉頭：「遲咗啦！我叫咗啦！」
   邊個咁膽粗？老街坊定老相好？
   我擰左望向女客個枱時，老行尊顯然察覺到，側側頭射哩我。
   講句笑，是否因此，我離座找數時，鄭君綿冇埋離俾單我，由後生同事代勞？
   這份茶餐王有三Like：
   一是上餐快全球獨步。今次特登暗中數：我與先後同枱的兩人，落完單到上餐，或只有3-5秒，而且往往兩道主菜齊上。
   二當然是炒蛋夠滑。
   三是奶茶夠香。
   至於叉燒通/意，政治術語說，還有改善的空間。
   若還有第四Like，或許就是被伙計窒的虐待狂快感。此前聽說有幾人坐低後大概彼此嬉笑，未及時落單。耳邊傳來說：「唔使急，至緊要快！」坊間瘋傳！
   但我最欣賞的是唯孟買百萬份午飯速遞可比的非電腦作業。
   今日由於未滿座，我得以hea食，坐了怕有15/20分鐘。直到離座，我那張四人枱都只有我和另一個客。因而，得以注意到多年來一直忽略的細節。
   原來，一眾樓面白色上衣的左上袋繡着商號，其下是一個數字。在我面前經過的樓面，號碼最大25。鄭君綿原來係No.「1」，即非老細，亦至少係老董，窒客話唔定係賣點。

   幾百呎的鋪面，連收銀、清潔等不穿白制服的員工，怕至少30人，以今日既人工，唔係小嘢。物業肯定自置，否則門口一排隊，早就被爆租逼走。
   呢種港式茶餐廳/大排檔效率係點煉成的，薯片有冇諗過總結推廣？