日確由日前11k回落到9k，連近月慣性話疫情嚴峻的張醫生，口風都軟咗。
不過，要睇周一+3日病毒潛伏期=周四/五的日確，先知道中秋長週末爆幾多。周五如果仍然係10k+，先敢話疫情轉疲，後市看跌。如果~14k，即係中秋群聚有後果，話唔定要20k先到頂。
講疫情，本週既熱話唔係本地，而係日本放聲氣開放自由行。睇樣金秋就可以去賞紅葉，今冬肯定可以去玩雪。
百萬計既港人餓咗旅遊將近3年，其中有幾十萬每年去幾次日本。怕會咬住牙關承受返港的3+4隔離，呢個秋冬恢復出行。
若此，壓力會反過來轉向特區政府：會否提早放寬回港的隔離至0+7？11月因為主辦銀行峰會和國際七欖賽，肯定要做到0+7。如今只係為港人外出旅遊，提早到10月實施。
鄰近靠旅遊既國家日、韓、星、馬、泰…近月競相為外人入境鬆綁，相信係針對秋冬的旅遊旺季。呢的國家既旅遊業已空轉了將近3年，整個行業鏈近乎崩潰，千萬計既人失業，這個秋冬再不迎客，至少要捱多半年到明春，於是咬住牙關頂硬上。
針冇兩頭利，無人不知，開關多少都會爆疫。但捱咗3年後，寧可承受醫療和社經成本，甚至賠上幾條命，都好過幾千萬人閉關自賞，經濟陰乾，國民悶死。
這樣開關不是躺平，而係搏命。講到底，爆疫之初，人人有積蓄，保命為先，抗疫不遺餘力；疫情持續3年後，期間一再反覆，唔知幾時完甚至有冇可能完，積蓄已用嗮，政府都乾塘，逐漸冇選擇。疫雖然不能不抗，但飯就更要開。幾十個人才有一個染疫，但冇人能長期唔開飯。何況，現在染疫的人十有九病情輕到似流感。但餓肚皮，十個有十個的反應都一樣。兩相權衡，冇得揀！
沒有留言:
張貼留言