220710日晚30°C 80%：安心出行變唔安心？

日確連續第三日平穩，好事。但我們其實要學會：即使短期內日確飆升，仍處變不驚：升高個人防疫措施的同時，繼續沉著生活。

澳門停賭場工商7日，被稱「半封城」，2.5年來最辣；期間更讓僱主不支薪。工薪族叫苦！

按抗疫辣度排，內>澳>港，很反映三地的管治哲學。

澳門與珠海近乎雙城，客觀上要緊貼內地。英國人就厲害，治港個150年，刻意丟空最北邊與深圳接壤的地帶，寧可港人冇地方住，都要與北邊隔開雷公咁遠，盡少受其影響。本土意識就係咁煉成既！

港而家終於要拆除與深圳之間的荒地屏障（美其名曰保育。保育其實去到某個程度，係借來隔離大陸既策略），融入內地！相信10年後，港樓就會起到貼近深圳河，與對河的樓近到可以嗌過去。

今日令港人最緊張既，怕係長時間喺深圳行醫既新任衛生局長考慮「優化」安心出行：學內地實名制、細緻區分持有人是否確診…。理由見報道，不贅。大致上係避免有染疫者進入公眾場所，波及無疫者。

但以all persons are created equal的「普世」立場出發，一定媽媽聲：分化市民、懲罰弱勢、暗中監視個人的行動（按19年上街人既邏輯，的資料實係送中啦！）

但所謂人生而平等其實只限於抽象的人，相當於文法上的位格。現實中最接近既係法律上，所謂法律面前人人平等，王子犯法，與庶民同罪。但其實，王子與庶民被告上庭時，所能享有的辯護條件好唔同，王子會有成team最好的大狀，住劏房的庶民或只能請法援處幫手。

我絕對唔相信現實中（注意：唔係指抽象既人）既人係平等既(我同你就唔可能完全平等!講到底，即使同卵雙胞胎，出生後都無可能完全一樣地發展。科學上，同卵雙胞胎不可能由出生到死亡都在同一時間、同一坐標的四維空間生活，兩人的遭遇同世界觀必定會有差別)。

所以，我反而讚成細分安全出行。關鍵在於分界線：係為公眾衛生，而唔係做Big Brother。或者我已經好老，即使Google式的行蹤地圖送中，我都唔怕。反而歡迎隨時及實我。萬一我係街到lue低，希望有助於快的送院。

深圳放鬆入境，今日好多港人/港漂湧去過關回歸。惜檢疫跟唔上，隨時要等好幾個鐘。Well，相信過幾日就會舒緩，裡面一動員就好厲害。裡面既問題唔係做唔做得到，而係唔係好計較成本，政治壓倒一切。但浪費資源，長遠來說難以持續。裡面早期有句話：多快好省！雖然聽來矛盾，乜都講嗮。但其實還是辯證法：對立的統一，兩種矛盾的事，不斷地左右測試，找出平衡點。

刺殺安倍（右圖取自OD：

上月與兄長右三和弟弟右一等慶祝母親94歲左一生日。注意，或者是安倍母親的家，佈置與常人的家無分別。安倍一家是現代的政治「貴族」世家）的疑兇冇講錯，說明頭腦清楚，並非精神病。動機係「家仇」：老母沉迷一種宗教，捐嗮家財，破產而亡。

據說指日本的國教神道教某宗派。安倍與該教派關係密切？有可能。安倍並非信仰虔誠，而是日式愛國。神道教是日本建國的意識形態：天皇係天照大神之子，降世關照大和民族。由於天皇係神，所以，國民之間無論有何紛爭，都不能郁天皇，天皇永遠係皇帝！因此，日本軍閥、武士爭權殺戮，但冇人敢推翻天皇。故此，天皇由幾千年前創立那天算起，至今由同一個家族繼位。軍閥唔敢推翻天皇，只能當天皇係神主牌，陽奉陰違。

因此，安倍可信出於大和情，熱心供奉神道教某教派。若此，內地網民可說：安倍右派反華，「抵死」！

至於日人追究當時的保安，只能說，日本由於日常暴力少，保安也就鬆懈了。有得必有失。

講到日本，近日7-10月的夏季日劇陸續開演。通常每3個月10集，每週1x50m。但昨天看的《六本木Class》、《Teppachi! 鋼盔》，慘不忍睹。前者講子報父仇，但第一集埋下的伏線誇張得太不合理，男主角演得差。此劇似乎係翻拍韓劇。若此，誇張也就可以理解。這就是我不看韓劇的原因。看裡面的偶像男女，油頭粉面，做戲擺po，根本唔似人。

《Teppachi! 鋼盔》擺明係吸引的後生當兵的宣傳。為此加插漫畫式的笑料。而家更撞正有前軍人刺殺戰後最重要的前首相，有可能被腰斬。

至今睇過4部第1集，怕只有講年輕人創科的《騎上獨角獸》（獨角獸unicorn係金融名詞，指短期內飇上10億美元的初創企業）因為有西島秀君，勉強會睇落去。但對女主角永野芽郁麻麻，應該睇唔完10集。