190811日晚30°C 85%：唔係踩線

   反修例今日號稱玩港島東和深水埗，尤其是福建鄉里南來助陣，不排除會重演元朗事件的北角。
   但其實繼續學毛主席打遊擊，現稱快閃。長沙灣、銅鑼灣、灣仔遍地開花，特別針對各區的維穩堡壘。怕你3萬人咩？
   最具癱瘓力的紅隧連日被玩，但十分鐘就撤。測試摸清致命處才來真的？
   我來港第一個住處對面既深水埗差館，連日放煙花。記得當年六七暴動冇人敢郁差館。最近既土炮擺係欽州街近街尾嘉頓面包（嘉頓當年已系度）既斜坡，離差館過百碼。警方爆破前，高叫市民散開，我係屋企都聽到。
   今日或者黑白兩道鬧我撐警、戀殖。但在50/60年代，住正差館對面有著數，至少鼠摸唔敢掂。只不過夜闌人靜，對街偶然傳來慘叫：「阿Sir我唔敢啦！」警暴？冇咁既事。
   中學時的鄰居日前歷經一劫後，我昨午趁昨午未有活動，重遊故地。由黃金轉入欽州街差館既方向。市面如常，唯西九龍中心裝修外牆，用圍板封起。但故居年前開設的日本拉面鋪改為日式廉價扒房。換了食飯時間，我會幫襯，鋪面就係我做功課既地方。
   由欽州街轉入荔枝角道，行到彌敦道太子站。旁邊又係差館，但非社運日一切如常。
   下次或者學當年，由欽州街差館行到天星碼頭。沿途經過旺角、油麻地、尖沙嘴差館。不過阿Sir，我唔係代人踩線呀！