果然打風唔成三日雨。前日週三食嗮藥。好不容易預約到昨午去公立診所，點知撞正八號。捱到半夜落波，重新預約，但睇開既診所爆滿，改爲遠一倍既診所。
昨上午三號加黃雨。但新診所人生路不熟，最怕遲到被DQ。趁午間雨勢暫緩，提早“的”去，以免大雨等巴士溼身，要帶齊衫褲鞋去診所換。唔係黑換白、白換黑，而係怕候診時頂唔住冷氣感冒。
幸而診所夠大，唔使點等。醫生話，上次睇到而家好咗好多啦，俾多兩日藥啦！竟然半個鐘就睇完醫生攞埋藥，破光顧公院的記錄。跟住想去Liky的茶餐廳飲下午茶。但雨密路遠，只好在診所附近草草解決，打道回府。
今晨仍大雨，看預報會落埋聽日，後日週日才回晴。
今晚foretold的馬嵬坡譁變，當局高聲喝止。但熄火還是潑火，到時先知。但我如果係林鄭，今晨的早禱會肯定求天主降黑雨打救。
明週六也請天主開恩，更最好賜福多一日。否則，週日下午班友自顧自行街。完事後，班𡃁又通街走，玩到凌晨。維穩開支，立會班反骨唔批架！
但週一就拜託好天呀！而家唔少人叫囂在100年後的今天重演五四，搞什麼'三罷'，最弊連官都有人話跟，公然作反。管唔掂的兵，將帥仲有定企既？
好在薑係老既辣，阿爺早就預咗。駐軍出坦克拍片防暴，用港人的語言話明"後果自負"。即使班𡃁黐既，30年前係天安門見過威武之師既父母都明架。
港澳辦文，駐軍武，若再請外交部威懾一下外力，咁就完美啦！
對民間的五大訴求，至少其中的撤回修例、獨立調查，其實體制裏的知名之士也愈來愈有共識。至少可打開僵局，像習特那樣，邊談邊打，好過拖而不決，官民同歸於盡。
但一把手似有心病，當冇聽到；二把手則有身病，愈幫愈忙；三把手管財經，人脈多過人氣，何況反派又最反經濟；四把手仲弊，上任以來有風雨無建樹。
第五順位係大法官定立會主席？大法官港人雖然都信，但從未涉足政事，也不善中文，當衆宣誓就任怕都難。立會主席則肯定被班反骨同事反到底。
說到'禪讓'，不少港人其實懷念阿John。佢應該都有志。但當年發起佔中的教授在獄中寄意，我們又少了一個worry。阿John，教授話你可以放心enjoy life喇！
最新的港情，今天見報的是：金融界千人冒雨快閃反送中；朱凱廸話：黑幫搵絕症病人暗殺我；護士上環前線救人被控暴動；警搜火炭工廈檢物資 民族黨召集人陳浩天等8人涉藏械被捕，當晚黑衣先後圍沙田和馬鞍山警署；醫護今天放工時間愛丁堡廣場集會；
當然，還有MP頭版頭的"選民首破400萬 淨增30.5萬 學者：建制上屆得票贏不足兩成者 區選勢危"。但我覺得雷大雨小。區會冇權，即便泛民區會夠票選人入立會，最多不過兩席，不足以平衡DQ的6席。何況等區會選立會，蚊都瞓。
此外是經濟：特朗普說中方買貨得個講字，九月氣對餘下的3,000億美元中國輸美貨物加徵10%關稅 港股急挫；貿戰示威夾擊 零售連跌五月 業界：佣金挫 勢裁員。
但歷次股災都說明，金融市場通常反應過火，除非基本因素太差，否則不會持續。心理一逆轉就反彈，而且來得很快。2008年秋的金融海嘯，也不過兩年左右就掉頭。市場內部恐怖，社會氣氛差，但常人捱一捱就頂住咗，很少有災難性的反應。
沒有留言:
張貼留言