190821三晚29°C 78%：My Friday game plan

        理療日。上次撞正8.5，今天才番做。阿Sir好好，停咗成個月，先請我左右前後彎腰，看康復程度。我話，傷愈後最明顯的變化係：腰部原有的「避震器」衰咗。而家由行人道落車路，一分心唔記得有一級，即使1-2吋高，落地都躉一躉。今後要步步爲營，再躉親就怕要提早彎腰做人。
        阿Sir check過我的狀況後，讓我再做前幾次做開既運動和磁療。但停咗一個月再做，腳好痠(yuen)，10分鐘的滑雪機甚至無法一氣呵成。顯然懶了弱了，要番gym補課。
        做嗮所有嘢後去見阿Sir。話：你生活上OK架啦！小心的，唔使再離啦！
        腰傷後理療應有10次。雖然不捨得離開，但深知需求大，應騰出名額給更有需要的人，只好鞠躬多謝阿Sir。等10月再見醫生。
        理療後剛好食晏。久未食蒸魚，這次的鯇魚竟有魚頭云。上次食魚頭已是史前的事。我小學時在廣州唔食魚，怕腥，可能受父母都唔係廣東人既影響。但來到香港後，尤其成年後，鍾意食蒸魚多過食肉。但煎炸就麻麻。尤其討厭炸，毫無魚味。因此，天生做唔到鬼佬。
        飯後回家路上，金光耀眼。
        顯然因上午理療透支，回家後在牀上攤到四五點。
       接着上網發覺，今日係元朗「恐襲」滿月，有人呼籲今晚番去靜坐。希望不會再有事。
       由元朗事件再看到8.23的人鏈預告，忽發遐想：87年回港後就住港島，但從未由一頭行到另一頭。週五傍晚何不沿著人鏈，由筲箕灣行到中環？
       中學時大多數時間住在深水埗，由欽州街行到天星碼頭是最大的娛樂。但期間有一年多，父親在青山道的紗廠打工，住在男工宿舍。母親另有居所，但不太方便，於是安排我在她認識的人家裏循環寄居，每處兩三個月。其中兩處是港島的跑馬地和北角。但在外寄居要加倍behave，即使無聊都唔會去行街。
       但更重要的是城市佈局。50/60年代，港島的金鐘係兵營，今天的鰂魚涌、太古係船塢，西灣河係漁灣。換言之，港島沿海有幾段是「荒野」。彌敦道才是唯一由頭到尾有屋有鋪的第一大道。換言之，雖然德輔道中是權力的大道，彌敦道才是市民的大道。我以九龍爲家，是有福的。我當時對港島毫無歸屬感。
           一於咁話。週五下午帶水、更換的T恤...。大約六點去筲箕灣食街，等人鏈成形就沿着其西行。中途稍歇。希望在人鏈散開時分抵達金鐘、中環。
         至於中環到堅尼地城，行過不止一次。反而更想由深水埗行到荃灣，或者由黃埔行到觀塘。紅磡、土瓜灣也是我寄居年代曾經住過的地方。