230723日晚30°C 81%：挾體育以自重？

    昨週六本想介紹一齣日劇，但晚上看戲打發了。
    首先恭喜曼聯，在美國友賽阿仙奴淨勝2球，而且冇拖泥帶水。
    我的直覺：下月開鑼的英超新球季，曼城仍坐亞望冠，曼聯上番三甲，阿仙奴落番第五、六，車路士稍好過上季。

    如果問我鍾意英超邊隊多的，我會話曼城。唔係因為贏，而係穩定，比較合作，少勞嘈。
    近日更神奇既係美斯。首次為美職上陣，末段後備入替，竟然在補時第4分鐘射入30碼既罰球，為班主碧咸贏得2:1。希望係佢新事業既好意頭。
    鍾意運動、捧體育明星本來好正常。但過去呢二三十年，國際獎牌似乎成為本土自豪、遺世獨立、爭取國際好感的象徵。
    念得出既運動，只要西方有人玩，我地都有人投身。不久前，有冰棍球員訴說社會支援不足。亞熱帶地方，玩ice hockey唯靠溜冰場，練波比賽時，要請走人數多得多的溜冰愛好者。700萬人有幾多資源可以撥俾恐怕只有700人玩的一種球類？
    但原來香港真係有冰球隊，而且係青少年。日前出國際賽，與對手在場內群毆，全港方知。我對ice hockey冇乜興趣。但早期在美國先後住過十幾年，入鄉隨俗，對於當地的四大職業球賽，略知一二。

    Ice Hockey係四大之末。比賽時，最吸引既唔係技術，而係幾乎每場都群毆，雙方用冰棍互bok。這已成為冰棍球的標準劇目，觀眾預咗，萬一唔開片，反覺有所失。正因為群毆已成傳統，球員都明白分寸，bok身體邊部分唔會傷。大家都靠開波開飯，打交係加料愉眾，唔係攞命。

    冰球之前的美國三大球類應該係：棒球、籃球、美式足球。
    棒球被視為美國國技；籃球就無須費唇舌。
    美式足球American football係按美國文化改裝既英式欖球rugby，不能稱為欖球。所謂美國文化主要係加強「力」的成分，講穿就係暴力：球員穿上內有金屬支架的盔甲，俾能加強衝撞力度而避免嚴重受傷。說白了，美國人覺得英式rugby唔夠喉，故此幾乎冇人打。因此，國際上英式7欖，幾乎未聞美國隊贏過大獎。
    反之，英式7欖隊如果著美式足球既盔甲同美國隊打，怕好多人被抬出場。
    這兩日本港同樣有兩宗體育消息，多少彰顯了港人這方面的心態。
    1.港終於有足球員得以在港人最愛的足球王國英倫落班。但你念到係邊級嗎？
第6級，亦即1超2甲3乙4丙5丁6戊（其實我唔知係唔係叫戊，話唔定居間有預備組、青少年組之類）。入第6組都見報，港人需要的心理慰藉可想而知。
    2.少年跳繩隊在國際賽囊括幾十個獎牌。唔怕講，我唔知道呢次總共有幾多獎牌，又按年齡、身型分幾多級。但看港媒報道，可見港人幾緊張。希望奧運快的加埋跳繩啦！