240623日晚31°C 76%：God Bless the King?

    我唔係Anglophile，想做也沒有資格：12歲跟阿爸係廣州落離，連街招既“Hong Kong”=“香港”都唔知，冇英中肯收。加上與父母都唔係‘港生’，冇BNO，至今冇家人與英國有聯繫。

    少年時期，唯一與英國人既close encounter of the 3rd kind係住正欽州街深水埗差館對面，差館後面係兵營。偶有英軍離光顧我屋企隔離既煙仔檔。但個時深水埗人有幾多個識英文？與鬼佬不過係眼望眼。

    英國我大約20年前去見識過2次，合計大約10天-—但適逢世紀轉折，有點紀念性：
    記得飛抵倫敦翌晨，在地鐵站外的大電視看到小布什宣佈出兵伊拉克，以報9.11的深仇大恨。與此同時，忠實盟友貝理雅忙於解釋，為何英國也陪美國玩。
    但我1967年初到美國進修，就獲香港同窗Peter點醒：美國人有efficiency，英國人有subtlety。我當時唔明呢句話點解，因為都幾subtle，係唔係？後來先識多的。
    要到近年睇刑偵英劇，相反睇唔落刑偵美劇，再讀下歷史，先比較明白英國人subtle何所指。刑偵既英劇vs美劇兩個字講嗮：前者郁口（brainstorm），後者郁手（動作）。我至今睇過既英劇神探，冇一個係查案時‘講’過手。其中最Like既阿Foyle（新世紀英文推理大師Anthony Horowitz既創作），50開外，溫文幽默，似乜師多過警探。第二Like既“Vera”就更大媽：看似5’2” 130lb 腰圍35，揸架殘jeep，疑凶萬一發惡拒捕就死梗。

    回到文初第一句：本博今日講英國，因為咁啱咁橋，連串花邊都來自倫敦：
1.首先當然係7月4日大選。由於民調差距大，執政的保守黨預料輸到仆，輪到工黨上台。
2.英國史上，預料首次有在任首相連自己既議席都輸埋。
3.似乎也是英國史上罕見的：極右的“改革黨”冒起，未致於執政，但有可能左右工黨的管治。其黨主席說：烏克蘭不斷向北約靠攏，令俄羅斯孰不可忍，被打係自己抵死。
4.執政黨內有高層係賭盤落注買本黨輸。
5.日本天皇和皇后到訪英國，完成多年來的心願，獲英王盛情接待。
6.皇儲William帶同三個幼齡子女，御駕親臨捧美國樂壇天后Taylor Swift場。一家四口在包廂裏聞歌起舞，high到好似普通fans。事後獲天后在後台接待留影。
7.英格蘭隊至今在歐國盃表現欠佳。皇儲捧完美國天后，繼而親臨己隊後台打氣，加油！

8.身家370億英鎊的印裔英國首富以大約7英鎊日薪，係瑞士既寓所請3個印度同胞日做家務18小時。首富家族其中4人因而被瑞士法庭判監4-4.5年。希望呢4位紳士淑女未來4年好好享受自己既成果！

    寫到這裏，人也累了。週日晚早點休息吧。Have a good week。接著就係長七一週末啦！