210202二晚19°C 80%：年初一至三應有grace period

確診超少，無厘頭仲少。但至少睇到禮拜尾，先知第四波是否退卻。

官必爲此邀功；民亦會繼續鬧官騷擾。封區無疑可抗疫，但當局不善機動做嘢，難免疏失擾民，加上人工貴，成本效益低。

與此同時，居民行動、工作受限，有人睇死政府不得人心，小事化大，俾政客、記者做大佢攞彩，亦勢在必然。

限聚延到年初六，茅到有違常理。港人服英國人，就因爲入鄉隨俗，識得變通。年初一至三，唔執行禁賭、阻街法例。長輩因而讓啲靚玩大細，街上則有人開魚蝦蟹。只要注碼無傷大雅，警察經過當睇唔到。但一到年初四，人人自動回復正常。

但港英從來冇爲初一到初三的grace period立法，純屬約定俗成，官民彼此識do。

如今750萬人已捱咗一年。年初一至初三都唔「鬆將」，只會加深民憤。再說，上下三代入屋團拜，食完飯阿爺阿嫲開枱，後生圍埋打機，唔戴口罩，攬頭攬頸，唔通破門入屋告人限聚乜？

做唔到既嘢，就只能放開。年初一至三些少播疫無可避免，只能當作不可抗力的後果。事前對醫護講明，懇請諒解。我相信醫護也明白，過咗年再來執手尾。

當然要誠懇勸喻市民：家族團拜、情侶拍拖就好，但要照顧好體弱的老人家；親友、同事、同行…就一於Zoom同轉數快啦！

但講明年初四就回復限聚。

年初一至三因爲家庭團拜而造成的傳播，至少容易追蹤。