190618二晚：唔辭難收科

   剛才四點鐘的”道歉“，一不提”撤回、撤銷暴動指控、下台”的遊行訴求；二不覺其誠，還不如TVB專訪。我冇遊行都唔收貨，何況過去兩次的百萬行大衆？
   客觀上，呢個talk show實在反效果。試問點收科？
   三大訴求裏：撤回最易做，衰在面子落唔到。暴動指控弊在涉及警隊文化：我收你order做醜人，而家被人鬧又要我孭，你老母！失卻軍心，政權難穩。
   至於下台，“非本人可決定”純屬當局解嘲。上面一切睇黨，想做點會做唔到？當初董建華腳痛，你信？60歲的女性，腰痛很平常。大可學我，帶個腰封出鏡，道歉道別。大家都會祝佢早日康復。我個物理治療師好好，很願意推薦。
   竟然一樣都唔制，咁就後果自負！
   我跟唔貼新聞。後來先知，佢最大鑊唔係唔撤修例，而係話與民衆對峙時，警隊用武「天經地義」。係今日既氣氛下，單呢句已足以去職！
   腰傷三個月以來，今晨第一次路經金鐘。通往中信的有蓋走廊，標貼鋪天蓋地。針對警方‘暴力’既更多過反修例。用詞集中係一個shoot字。你作爲最高統帥，竟然話shoot my son, my mom, my sis, my student....「天經地義」。試問點肯俾你做落去！
   行政會議召集人公開說，呢次修例工作“完全失敗”，你應“多次道歉”。建制中人雖一再強調辭職不可行，但看語氣，上頭的意思多過真心。
   若此，你正如剛才外記說，已成lame duck，如何履行職務？手下就算繼續返工做嘢，也唔會落力。因爲，750萬人怕有三分二憎你，一半與你勢不兩立，你講乜都頂番轉頭。餘下的怕也想你走，以求重新出發。死拖落去只會荒廢自己的光陰。不如退一步，在內地委任的其他崗位上爲港出力，將功補過，同時爲家人盡妻子和母親之責。
   我唔夠敏感，好多嘢都低估咗。上週三警民衝突後見田北辰出鏡，才醒起係噃，咁就真大鑊。
   佢話：有人怕六四在港重演。的確，如今西媒已連日用香港做頭版頭條，而且都站在港人一邊。若再來一次對峙，有幾個平民遭遇不幸，香港難免暴動，西方將全面孤立中國。現在人手一機，個種壓力非30年前連電腦都未普及時可比。對美鬥爭唔使 諗啦。
   若此，中共死也不肯平反六四，係頂硬上維護所謂的革命傳統，但內心其實叫苦。
   日前還有一個說法：提名港人角逐十月公佈的諾貝爾和平獎。客觀上的確有機。750萬人的城市，連續有百萬人遊行抗議，史無前例。我係評委，也只能say yes。

萬一真的來個翻版“六四”，咁就更攞梗。西方甚至要開門庇護港人。中共無論點阻都頂不住。
   最後，證實了此前的觀察：港青吸取了佔中的教訓，由激進退回到持久、多元、多層的鬥爭。上次霸住主幹線79日，令民間的同情轉向。當然更不能用旺角暴亂的方式。要讓市民看到抗議者是公民社會的公民。例如：在遊行中'紅海開路'，讓大巴通過。
   電視拍攝到抗議者討論，最終決定撤出主幹線，讓市民上班上學。這完全正確。不能將未加入抗議的市民當人質。每個人都有必要做的私事，公民社會要諒解，不能因爲對方不支持抗議，就當陌路人，唔理人家的需要。呢個同醫生、律師既專業操守係一樣既。所謂無類也。
   抗議者有此’覺悟‘，當局無可能翻盤。