190611二晚雷雨：吊命

早上開Viu，沒看熒幕，知道比數就算。但竟然遇到將近50年前類似的巧合。
總比數落後1:3的灣區Warriors(金州勇士)末段落後幾分下，最後一分鐘靠三分波反壓多倫多Raptors(速龍/暴龍)，得免出局。家人飲得杯落！
72年奧運籃球決賽，美國對當時的蘇聯。美國的籃球本來遠遠拋離第二位。但當時奧運仍屬純業餘，無職業運動員。美國隊由二線大學隊球員組成（一線大學隊球員可能已獲贊助），蘇聯才有機會。
決賽是美國時間下午，我剛好由芝加哥到紐約串連，在華埠的釣魚台運動竇口，與同學攤在地板的牀墊上看直播。最後幾秒鐘，美國憑一個波（當時冇三分波球例），以50:49僅超前，全場雷動，美國球員亦跳起慶祝。
點知球證去場邊問過，轉頭話：仲有三秒鐘！蘇聯在底線開波，一手拋到美方底線，蘇聯高佬跳起搏入樽，美國高佬排嗮係自己籃底封網。唔入。美國隊以爲得咗。點知球證話唔算，蘇聯底線重新開波。
如是反覆咗三次。第三次竟然俾蘇聯高佬係美方籃底托到個波入網。球證舉手完場。蘇聯反以51:50壓倒美國，全場發癲。唔使問，美國只球員衝埋計分台，幾乎un冧張枱。但唔知點解，抗議無效，蘇聯名副其實“執金”。
有人話球證偏袒蘇聯，唔知係唔係來自共產陣營。有興趣可Google。
記得那一刻，身旁的同學都係保釣人，親共反美，有人係牀墊上大叫大笑。
我對美國從來不反也不愛，只博得一笑。