250325二深夜：公醫‘革命’明年上路

    對我來說，今天公佈的公醫明年加費大計，遠遠緊要過週前財爺公佈的年度預算案。
    唔怕俾人鬧：我基本上支持。
    但冇諗到當局咁夠pok。最厲害既唔係門診CT/MRI收500，而係門診由50元加3倍到200。
    相對來說，急症由180倍增到400，已算客氣。雖然危殆/危急症費用全免，但你想享用乜？
    按以往的社會風氣，事前以為加幅最多不過50%。
    而家呢個加幅豈止改革，直程係‘革命’!
    當局咁勇，說白了：在新時代下，政府強勢！
    舊日，泛民壟斷政治市場。政治上只有一個目的：普選！經濟上反對發展；社會/民生上循例借基層來壓政府價，加大政治壓力，逼當局用普選來交換。
    因此，公家收費幾年一次加20%已不得了，年均怕僅超通脹。
    故在新時代前，60-70年前英治定下的超低收費結構，永遠無法改善。後果短期是需求長期爆棚，嚴重擠塞/congestion；長遠則庫房遲早爆煲。
    近年連年的千億赤字，基本上與此有關。
    當然，更根本的因素是人口老化：長者在750萬人裡的佔比穩步上升，壽命也越來越長，加大醫療、社福開支。
    （這並非為政府部門超高的運作費用，包括官員和公僕的超市場待遇辯解。改革公共服務收費結構的同時，特首是否也要搵個港版Elon Musk幫下眼？至於美國Trump王不經正式程序成立的炒人部門DOGE，香港只要守住歷來的法治程序，是不會出現的。我們大可放心！）
    急症收400若真能鼓勵頭暈身㷫、屙嘔肚痛的求診者改看住處附近收費相若的私醫，縮短急症室輪候的時間，讓醫護有較寬裕的時間照顧較少的求診者，尤其是危重者，善莫大焉。問題是，如何確保，部分衝急症的市民改看私醫後，後者不會借勢加價？
    我近月也因為傷風感冒看過收費300-400的私醫，服務滿意。但收費可能在私醫裡算比較平，日日都滿額。非熟客冇得預約，幾乎醫務所一開門就要去輪候，等醫生有空檔時叫你遞補。
    目前門診收50的做法，基本上24小時全港的政府診所都爆棚，連長洲都冇位。我上月因為腰扭傷（先看了幾次大學中醫，相信盤骨髂qià骨與骶dì骨之間的關節有傷。但限於費用，難以長時間睇），按政府門診預約app的建議，每個鐘click入睇邊個診所有位。初初只留意區內的診所，後來發覺根本不可能有位，逐步擴大到全港，發覺仍然係逢診所都“暫時滿額”。最後，唔知點神起上離，突然蹦出一個未滿既sign，條件反射地click入，才算搶到位。
    我去個間診要轉車，地鐵大約10個站。我唔熟附近，怕遲到被DQ，早咗成個鐘頭到。候診大堂大把空位。但輪到叫我入房，已過咗預約時間個幾鐘，換言之，我頭尾係診所坐咗~2.5鐘，坐到要起身做下伸展。
    結果入到醫生房，由推門入去到出番離，最多3分鐘。我講完症狀和可能的成因後，醫生做咗一個我覺得重要的檢查：試下腿部有冇痛。我覺得冇。

    由於腰痛冇放射落腿部，醫生判斷係肌肉痛，無關筋腱、神經，來唔係大件事。於是開必理通同一種肌肉酸痛搽的軟膏。兩種都藥房有售，無須醫生寫紙。
    換了改革後200一次的門診，我是否有權問醫生可否照X光？甚至可否俾500蚊照MRI，睇下軟組織有否撕裂（CT無法顯示軟組織）？又或者請物理治療部評估傷患的性質和程度？
    晚了。就此打住。希望改革後，醫生能給病人多一些時間和關顧，給機會病人表達他們的感覺。