220619日晚29°C 80%：新官上任睇住先

7.1後的全體問責官，今午正式揭曉，與日前的「傳聞」基本一致。

看上次邊份報紙獲得放料，邊份冇份，可知今後邊份係「權威」、邊份冇料，又或者反過來，扮演新型反對派的角色。

至於新班子會否好過現班子，睇落去啦！反正普通人無從置喙，無謂拗，自尋煩惱。

但有一樣係真既：新政府的確係武官主導。連特首辦既公關大將都由記者/評論家改為揸槍出身。我唔反對，風水佬呃你十年八年，公關佬十個月八個月都呃唔到架！

本地確昨再升~一成。借《共產黨宣言》講句笑，第六波的陰霾在750萬人頭上徘徊。

但驚得咁多乜？我基本上同意：covid-19演化了2.5年後，已逐漸成為全球的風土病。

1.人類無論幾努力抵禦，呢種病毒都死唔去。是為自然界的規律。

一個月前，本地確一度低至250。但死唔斷氣。我當時就覺得係惡兆。果然，係250-350徘徊咗兩三周後，調頭復升。而家番到1200水平。不排除會重上二三千。

2.與此同時，隨著

a.有七八成打夠針，

b.有三分一甚至二分一人中過招（大多數無症狀，中咗後康復都唔知），

a.+b.的八九成人口多少有的抗體，covid-19惡唔到去邊，多數形成流感類症狀，用感冒藥都醫得好。只不過要係屋企甚至方艙踎十日八日，損失返工、返學時間。

唔係話冇人疫歿，但通常係有慢性病的老弱、打唔夠針的極少數人。第一類人本身就不幸，第二類好多係個人的選擇，又或者技術性的失針，係西方式社會係無可奈何的事。只能為他們祈求上天保佑。

香港其實已進入2.的社會。只不過，作為中國城市，要與內地動態清零的總路線保持一致，不能學自由派的歐美，與病毒共存。

中共信奉馬克思、唯物，相信人定勝天，一定能消滅害人的病毒。人既然是世間萬物的主宰，也就不能與無意識的病毒妥協，讓其繼續播毒甚至殺人。因此，人vs毒不兩立。

不怕說，我對人類冇馬克思咁高既評價。即使撇開宗教不談，我也相信人在大自然跟前要謙卑，不要以為自己主宰一切，世間萬物都要聽從人類的主宰。我更願意向大自然下跪，感謝它孕育了人類和億計的動植物，讓我們生養不息，享有美好的環境。

因此，港人必須明白，清零vs共存是兩種不同甚至對立的世界觀，並非政治口號咁簡單。我們在港，最終要跟從清零。最多係在清零的過程中，考慮到港人百年來散漫、抗拒組織的習性，用較為鬆動的手法。

我相信，香港企得住。但硬要借各種名義，塞入歐美的共存信仰，是過不了內地關的。