年來當作陪長輩做手部物理治療，一生中打牌最多。
老母當年唔湊仔，最多係朝十晚六出外打牌時帶埋我，坐係佢左手邊，求息事寧人。
麻雀枱變成我個兒童樂園。因此，五歲就識上碰叫食。在枱邊提醒母親上碰後，更成爲佢讚仔的最佳話題。
打牌係老母繼「床前明月光」「車轔轔，馬蕭蕭」後，給我唯一也是最後的一次母教。惜我冇佢既資質，對任何博彩都無動於中，老虎機都懶拉，也唔信自己會咁好運。因此，賭博對我就像瑪雅這類失落的文明，早慧但也早夭。
退休後才來陪打，深感打牌係長者動腦動手的最佳選擇。老人最怕就係唔行得、癡呆。
打牌唯一唔恭維的係坐得耐。但可較定手機，一個鐘響一次：打埋呢鋪就起身，圍住枱行十個圈。
至於注碼，每次上落幾十，相當於每日既生果金，夠飲杯茶食個包就好。
只要體能許可，自己洗牌、疊牌來運動手臂手腕，唔好用自動既麻雀枱。越自動，自己就越冇用。
或因此，最近睇講麻雀高手對決既冬季日劇《天和街英雄》，看日本牌與中國牌之別。看主角造型應源自漫畫，用打牌比諸武林決鬥。
原來，日本牌透明度高，唔使記牌，技術要求唔及中國牌：
1. 各人打出的牌要按先後，由左至右排列在自己面前：例如：面前是北、南、九筒，說明開牌已3 round，呢家依次打北、南、九筒。因此，冇人須要記其他三家打過乜牌，睇你打過的牌，就知你係唔係做大。
2. 叫糊要宣佈：讀來似"ichi"，近似日語的"一“。人地擺明做萬子，叫咗ichi，你仲打萬子出沖，咁就抵一家包嗮。又好公平。
此外應可證實，麻雀源於中國。日本牌既碰、槓、上，發音近似中文。不同的是"食(粵語)/和（普通話）"，日語讀'龍rong'。
至於計番，我見識少，唔敢話日本牌係唔係學台灣。例如，”七對"可食糊，讀作“chiduiji（七對子，拼音qiduizi）"，近似客家音。但七對既頭六對全靠摸，冇得上、碰。叫糊先靠單吊。咁難食，當然滿（日語"滿貫"讀作拼音的manggan，聽來似普通話"蠻幹"）啦。香港唔知有冇。
一句話，牌自中國來，中國較高章。
沒有留言:
張貼留言