240717三夜29°C 89%：新時代的南北和

    DSE與我的時代相距60年；Trump又已講了2天，宜到此為止，以免你以為我捧他。
    我看時事，想盡可能像站在賭枱邊上的旁觀者，估下一鋪開幾多。純屬或然率遊戲，自己冇利益，儘可能客觀。
    今午落堂後跳上巴士。行咗大約一個站，大雨就殺到。落車時傾盤，有遮都冇用。幸虧就近快餐連鎖，可以借下午茶避雨。
    坐咗半個鐘後，雨已停。去到綠巴總站上車後，見係呢條線相熟既司機。
    我剛坐下，2女1男手持手機朝小巴走過來，看似打量是否這路車。車長立刻主動示意，表示沒錯。
    3人上車後，車長示意付費。還是年來常見的問題：只收現錢、八達通。
    這條線由於途經去頭號景點的轉車處，年前通關後，經常有遊客來搭。見不收WeChat、AliPay…，起初頗有意見。現在大概知道港人少用手機pay，開始適應。
    我們這位車長脾氣特好，但有趣的是：全粵語對白。接近遊客落車處時，會高聲提醒：“XX（景點站名）沙車！”4個字都係粵音。
    但想深層，車長做咗功課架！粵語講“落車”，“沙/sah”係粵化既普通話“下/xià= xia4”！ 
    不料，這次上來的2女1男，其中1個阿姐原來識粵語：聽大約7成，講有口音，詞彙有限。上車後，與同伴坐在司機身後，或者想請教。我地既好心司機不管對方聽得明多少，全粵語滔滔不絕。車行咗幾分鐘，已經表白（唔係個種意思！）：
1.上去行山？我都行過啦…七個字就可以上到頂，不過好斜，要爬、攀藤…。
2.我都上上面行山㗎，（深圳）梧桐山…，行嗮。

3.香港的山行嗮啦！
    阿姐：你地上去行…我地落離行…
    言下之意，覺得有趣。但貪新鮮、換口味人之常情。
    阿姐：你揸咗幾耐車呀！
    司機：幾十年囉！80年代…我都係上面落離㗎！偷渡呀！我係廣東人。
    （我這才明白，為何司機阿哥七個字可以由地面上到山頂！因為後生個時係攀山過離㗎！）
    上面落離既阿姐自然也聽懂了這句。我坐在阿姐後一排，似乎聽到點笑聲。
    後來再想，呢位識聽識講但粵語非母語既阿姐，多數係在珠三角甚至深圳長住既‘外省人’。
    但最有趣的是，呢位好心車長80年代（？）來港前，在廣東未講過普通話。至今仍然純粵對白，只將關鍵字眼扭歪當‘普’。
    不過，年來看內地遊客，或者經過‘教育’（包括“小紅書”或官方提醒），對於一些港人以粵語回應普通話詢問，不再明顯地反感。大概明白這是百年來的習慣，很敏感，非一朝一夕可改變。
    下次再坐呢位阿哥既車，我是否應該同佢傾番幾句：我都係上面落離㗎！同樣係偷渡！只不過比你早幾十年。不過，我既偷渡係‘假’嘢。因為，同老豆攞單程證合法出境。只不過先去澳門，係澳門三更半夜坐大飛屈蛇過香港，唔使攀山，唔怕俾人開槍打。
    當時50年代中，一大一細係澳門坐大飛過香港，好似要2千幾蚊。當時下層月薪或只有百鬆的蚊。老豆俾咗2千幾蚊水腳後，一窮二白，要係朋友既鋪頭寄住，最後俾人掃地出門。

    寄人籬下一年多後，老豆先搵到第一份工，係青山道上海人開既紗廠做簿記，搬去工廠既男職員單身宿舍住，同時偷雞在統倉既碌架床男工宿舍，搵空床俾我棲身，總算解決了吃和睡的基本需要。