231227三晚19°C 66%：What a Smart Play

    聖誕後的復工日，老天繼續回暖，本屬好事。點知對我和一些慣常上政府體育班的市民卻是dooms day.
    過去十幾年，我與一班同學上的政府gym班，每4周報一次名，先到先得，可親身到政府場地填表交錢或者上網。很多同學上慣同一場地、時段，跟慣同一教練，每個月都在報名第一日就一早出手，同一地點、時段的20-30個名額，可能半小時就full嗮。
    不知是否當局覺得班上太多舊人，不利頭一次報名想學玩的新生，今個月起，所有的體育班報名、租場，一律改用新app SmartPlay，不再接受親身報名（係政府設施前排過夜都冇用）、更重要的是：報名後一律抽籤，不再先到先得。
    要等抽籤後，如果仲有空缺（例如報名的人數少過班上名額，又或者有人抽到但放棄），才放出來供未抽中的學員先到先得。
    我們舊學員自然從善如流。但冇念到的是：同班~30位同學，報下月的同一時段，冇一個抽到。但隨機的抽籤唔可能咁啱咁橋。會唔會係：抽籤前，先剔走嗮的舊人，只係从來未上過gym班的新人之間抽？

    但既然冇舊人抽到，即係同班的將近30個同學都要係今12.27晨8:30開放抽籤餘額供先到先得時，先至進入SmartPlay搶位。
    由於事前冇同學抽到，今晨8:30自然人人都click SmartPlay，希望繼續有堂上。可以想象，那一刻會很緊張，網絡也很忙碌。有同班同學話，所有各種運動和時段、場地合計，博先到先得的人數恐怕以萬計。
    或因此，SP由8:30起，忙到1.進入app要輪候~20分鐘，2.報名的每個環節又要排十幾甚至幾十分鐘。其中一個程序，按下Enter後，整個畫面變花白，乜都冇，好似hang機。

    而且，再耐心等都冇用，因為app設定咗用戶進入SP後可以逗留的時限，可能係20-30分鐘。亦即你輪候進入SP到輪候每個報名程序所耗費的時間，若合計達到app設定的用戶逗留時限，app就會話你逾時，將你踢出app。

    這時你只有重頭來過：輪候進入app，然後輪候完成每個報名程序。例如，如果報名要經過4個程序，揀選項目、時間、地點，填報資料，確認，交費…，每個程序都要輪候，你最終可能又係未報完名就逾時被踢出app，前功盡廢。
    講得太長，浪費大家時間。最後一句summarize：我今晨8:30 click政府據說用咗5億元推出的SP，搞到11:45左右，才算meng衫尾，搭到尾班車，據說係我去既場地最後一個名額，但比我慣常去的時段遲一個鐘。我住得離gym較遠，落堂後回家需時。如果唔係冇選擇，唔會報呢個時段。但冇計啦。人上了年紀，要逼自己keep住，有gym做好過冇。
    神經衰弱3.5小時，搶來12x1hr的gym，到底應該飲番杯定喊一場？
    只怕一個月後又要重複呢個惡狗搶屎game。
    你或者會問：上政府gym班咁辛苦，何不改去私家gym？揀間就近住處的俾月費唔係得囉。
    但我既弱點係：運動非本性，純粹係希望將健康的日子延長些，縮短生命最後冇法自主生活的歲月，盡少連累家人。因此，定時定候返學最啱我，隨自己方便的時間去gym，只怕去幾次就放pear。

    再說，上咗gym班將近20年，多少認識的同班同學，大家縱使冇問高姓大名，等候上堂前見到，也有講有笑。維持social有利長者減少癡呆風險。去私家gym，三唔識七，只見一班玲瓏浮凸的健男fit女，我冇必要。再說，財政上已有20年只出不入，長期去一個月花費過千的私家gym，可免則免。
    但恐怕還是要為最後一分鐘log到最後一個名額而感恩。還有其他同學連衫尾都meng唔到。
    我们的城市越來越智慧。個別像我這種唔夠智慧的人，一要認真努力，二要求神拜佛，以免被社會淘汰。