230810四晚28°C 81%：No stone will be unturned.

    午飯後，密雨攔門，冇得行5,000步。
    資助「鬥爭」者打官司的「612人道支援基金」雖已摺埋，但看來手尾很長，難言幾位知名的信託人能否全身而退。
    有26-43歲的4男6女被指串謀該基金，接受海外捐款以資助流亡的港人或海外有關組織。順藤摸瓜，最後難免扯上基金高層。
    國安法現正全面落實，left no stone unturned。當初參與過事件的人怕預咗遲早有人上門。
    其中最多涉案人的35+初選案，每個作供者都講一周十日，由開審到而家怕有半年。除咗當事人同法庭記者，唔知有幾多人跟得到。

    *最近有兩樣投資多人搶：政府幫補我呢類老人既「高」息債券；聲稱7折開售的長實新盤。
    前者基本上只係抵銷通脹，後者先勁。私樓如果真係賣七折，與居屋相差不遠。如果你分/抽到，恭喜！
    但半個世紀以來，李嘉誠作為香港最成功的企業家，既萬人景仰，也樹大招風：丢！佢真係咁好死？睇淡香港，套現走佬之啩？
    的確，長實在港的地產份額早就小了很多。客觀上，而家新時代，香港歷來的經濟4大支柱：金融、地產、進出口、旅遊，後3樣完全可以由内地代勞。唯金融涉及貨幣的自由兌換，仍然需要以港為基地--直至人民幣可取代美元，成為國際最權威的通貨。
    若此，今後買樓恐怕不會再是港人的最佳投資—但自住應該仍有必要。
    問題是，李家坐擁幾千億，一個樓盤太濕碎，點夠佢地走佬？
    反過來，我也唔係幾信，李家賤賣一個盤，就足以壓低市價，逼對手跟進益大家？
    至於李老先生係唔係真想走佬，我有的懷疑。李嘉誠唔單只係最成功既生意人，感覺上也是一眾巨富裡，最有政治心思的一個，在政治上唯包玉剛可比。但包先生做航運，名下的船隻日日過訪唔同既國家，唔識番的國際政治，連船帶貨都可能俾外國吞咗。但李嘉誠50-60年代做廠起家，接著靠地產晉升為巨富。真係識政治，怕也是發跡後才領悟的。
    李家睇淡撤資說，怕已傳了20年。如果真係好擔心香港既前途，相信早就完成了部署，點會等到今日？反過來，可信上面也已透過各種渠道確認過。點會而家仲估估下？ 
    講離講去，這種傳聞要說真的是有關李家，還不如說是有人借李嘉誠來對有關方面施壓，就如不時要炒一炒移民風。