231028六26°C 83%：My good day…

     近日小小不適，多多唔聚財。用藥房買既藥無效，只好求醫。

    由於星期日診所休息，昨晚週五由傍晚起，致電區內的普通科門診預約。但電話錄音照例話：未來24小時亦即週六全日額滿，請我過一個鐘再致電，看是否有人取消預約。
       我邊撥電話邊祈求。但打足一個通宵，甚至逐一打去區內不同的政府診所，都係同樣的錄音。
    到將近天光先醒起：自己蠢，邊會有人半夜三更致電取消預約架？真有人取消，怕只會係朝早。於是，準備早上醒來再碰運氣。醒來後，過咗一陣再試，頭頭兩句錄音仍然係：（我致電的）診所額滿，但話音剛落，女聲轉而話：區內另一間診所有位，請輸入（個人資料）。我照做後果然約到。但係：不但地點遠，而且離預約的時間只剩1個鐘，我立即要換衫出門，路上還要一眼關七，遲到會俾人cancel。

    好在診所近地鐵站，一路順利。我以前未來過這間診所，但相對唔算逼，秩序良好。更有幸者：幫我睇既醫生好好，檢查不嫌其煩，盡責，有耐性，態度、語言都好soothing。

    步出醫生房後好感恩。雖然焦慮咗一晚，但奇蹟地在最後一刻輪到籌，又順利趕到離，見到好醫生，祈禱有功。
    而且，難得離到政府診所，索性順便打埋流感針，省得第日再奔波。
    但新冠就冇打，想等埋新一代既XBB。“希望在冬季“啦！
    係診所出離，天氣上佳，難得朝早出離，索性食個早餐慰勞自己。離開診所的地區時，更買埋兩餸飯，成日既需要都打發了。
    What more can I say? Except thank God for this Saturday.
    但相比之下，李前總理真係唔好彩。
    今晨新聞話：李生出事時，可能是在上海的賓館游泳，突然心臟病發。送到最近的好醫院搶救了十幾個小時都救不回來。
    最後，昨天的本博記錯了：李前總理其實今年3月兩會後才退下火線，退休至今僅7個月。上天為何不能給他多點時間？
    最後就今天的好彩記一個生活智慧：政府普通科門診預約電話錄音慣常說：
    （患者致電的診所A）額滿之後，接著說（大意）：鄰近的診所也額滿…。
    我以往對後一句不以為意。因此，昨晚逐一致電同區的其他診所碰運氣。
    原來，預約者致電的診所額滿後，系統會自動搜索同區的診所，有空缺的話會報上供預約者考慮。
    換言之，在同區的各診所裏，患者只須致電一間。我今晨最後一刻得米，就是拜診所數據庫之賜。雖然要搭10個站地鐵，但總好過週六、週日焗係屋企唔舒服。而且週日診所休息後，週一預約爆棚得更犀利。

    但點樣能夠讓多的有需要睇GP既市民預約到，唔使咁焦慮，好考當局的創意。當然，更重要的是資源。