220706三晚28°C 78%：我都想加薪...

本確突然從2,000價位飆上2,700。慶典效應彰顯？

短期內若重上5,000，通關怕又再次延遲，暑假回港的隔離只怕又再延長。保你大！

公務員不滿18萬同事劃一加薪2.5%屬例牌反應。這不但影響現職人員，也包括已退休的幾十萬人。他們的長糧也按這個幅度調整。

話唔定，當局宣佈2.5%時，已暗中留了0.2-0.3%這類小增幅，準備萬一反對聲音太勁，最後勉為其難，補番些小。又或再次分高中低三級唔同的加幅發放。

但看新時代的精神，公務員這種97年前留下的全港最硬職業慣性強勢，肯定要改。

上週港報才說，〈粵江浙滬公務員減薪三成〉。我初看標題以為寫錯，睇內文先知真係3 「成」，唔係3 「%」。

原來，內地中級公務員，薪水與一般人比，的確唔錯。科長之類有30-40萬一年，亦即月入近3萬。當然，唔同港公務員凈薪，內地做官的合法收入有諸多名目，包括交通、育嬰、住房...等各種民生補貼，以及分紅、獎金...。

點解咁多名目，我冇細考，你可以去查下。查到講俾我聽。

但由此說明，點解內地每年有幾千萬人考公務員。因為，以內地標準，穩陣、薪高、有地位，好過絕大多數既私企。

問題係，好多呢啲收入，係靠地方政府好景時定下的，亦即經濟好，蓬勃開發，引入外資，賣地起樓、生產出口...離支付的。但疫情拖咗兩年半，絕大多數地方既經濟都大幅放緩，收入大減，俾唔起獎金、花紅，可能連支付育兒費都有困難。

因此，不得不開刀砍，一落手就係兩三成。可以想象，好多公務員有苦難言。但內地政府強勢，大家要服從領導，跟黨走，與民同甘共苦，冇得er。

不用說，海外的反對者會幸災樂禍：官員收入大減，必另立名目，壓榨百姓。貪腐也必定更猖獗，加劇民怨，加速共產黨的敗亡！

我唔信，但有好多人會信。繼續睇啦！

220705二晚29°C 84%：新冠唔使驚？

重大更正：本博昨天說中俄艦隊合璧，環繞日本4個主島巡航。現據日方說：事件中，1. 俄只有1艘護航艦，不成隊；2.只是圍繞釣魚島/台周圍航行，3.是避風而非軍事行動。4.中方與俄方一樣，只是1護航艦圍釣魚島航行，相信也是為避風。

但1.1艘護航艦離開艦隊獨自航行？2.今天的軍艦，仍須避風？昨天東海打大颱風嗎？真的打大風，中國此艦為何獨自航行，而不及時返回母港？俄國攻烏後，近月與中國加強了友誼。俄艦為何不請求中方，讓其艦隻駛入中國的東海港口以避風？

不怕說，我猜日方是夾硬down play這次中俄艦艇的行動。

本確平穩。

總結親友間先後的幾個病例：

只要1.打足3針，2.無長期病，新冠19現階段既變種的確類似流感。

症狀包括：咳、喉嚨痛、疲倦、低燒...前後大約一周。

似乎不求診也會消退。

至於有冇後遺症，恐怕要過2個月先知。但我估，有後遺症的機率只有2-3%。重症更屬例外。

這並非說無須防範，而是反過來說：無須過份驚恐。

我估比較現實既態度係：

打夠4針；但有心理準備，仍有可能中招；萬一真的領嘢，盡量休息，與家人盡可能隔開一些（由於人均居住面積~250方呎，恐怕有7-8成人不可能真正與家人隔離。傳給家人怕在所難免），服用感冒藥、咳水。放開懷抱，勿過分擔憂。

要請一周病假，對日薪的朋友壓力大。但長遠的健康更重要，只能頂住。

咁講，唔係鼓勵各位盤pear，唔再抗疫；而係話，日常做足功課（打針、戴口罩），但亦心知，如果日常在外活躍，例如全日在狹小的寫字樓、工場，與幾十人近距離接觸、經常同同事一齊食晏...，仍可能有2-3成機會中招。

只不過，只要冇長期病，尤其是降低免疫力的疾病，即使染疫都唔使驚。

我好感恩，與家人由於冇工要/可返，隔兩三日先至出街買餸，打咗針後，似乎冇中過招。唔敢話今後都唔會中。但即使中，到時根據前人經驗，兵來將擋，水來土掩。同時祈求上蒼眷顧。

220704一晚29°C 82%：通關測試新政府成效？

港外怒海沉船，多1人獲救！

今凌晨5時許，中國海軍在距離勘探船下沉位置約100公里的北緯20度、東經111度附近海面，發現1個穿救生衣的船員，在海上漂浮了逾40小時，生命體徵穩定，現留醫。

暫時發現12具疑似遇難者遺體，有14人仍失蹤。

新政府除了要司局長落手做、唔齋噏，最迫切的怕係通關。聽口氣，想說服內地各行一步：港對北上者嚴格把關，換取較短的隔離期。

內地對外人而家的入境隔離係7+3。港居民北上如果可以5+2甚至3+4，治港者應可接受。內人南下應該也可以恢復3幾成，讓商家做番些少生意。

唔使講，得益者到時必作勢話幫助不大，叫高離賣。但大家心知肚明，清零要堅持，去得太盡反會得個吉。

本確最近接連2日由2100回落到1800+。但睇走勢，我寧可當係統計上既fluctuation。要接近週末，25週年+打風效應呈現後方可作準。我估升多過跌，但升幅不會太大，呢個subwave或cap於3,000。

如果可以拖到入秋先爆第六波，則呢個暑假可以happy番下，話唔定去個trip。唔係話我自己，係講緊750萬人。

近日烏軍失利份屬正常。俄軍苦戰解決了最難搞的Mariupol，尤其是一班亞速營死士後，挾餘威爭奪烏東的親俄地區，與當地親俄武裝合力，烏軍相對勢力孤單。捱到此刻才失守，已不容易。

按常理，俄軍佔領所有的親俄地區後，會繼續推進20/30公里，然後以此逼烏「和談」。最終係退回多佔的20/30公里，以示「寬大」，但將烏東親俄地區變成附庸的「獨立」國，對烏方話：Take唔take由你！你唔take，我就勉為其難，暫時託管住呢20/30囉！

睇烏統既回應，實在不敢恭維。唔係爭住俄統，烏統唯一可以贏俄統既係：鬥講talk show！

對華人來說，俄攻烏呢場仗唔單止改變歐洲，甚至可能改變東亞，尤其係中國與鄰近地區的均衡。

港人或懶理，但近日東亞有一樣好重要既發展：俄國艦隊首次與中國艦隊雙劍合璧，聯合圍住日本四島以至釣魚台/島四周巡遊。好似舊時既武士特登係對家門口開壇練功。

問題係：俄既對手其實係西歐，艦隊主力自然亦在歐洲，在東亞的艦隊只聊備一格。地理上，俄羅斯既重心係歐洲東部，遠東部分地廣人稀，與日本只有北方四島的爭議。呢次特登遠離本國的核心地帶演練，好明係應中方之邀，陪太子讀書。

俄羅斯雖然在100多年前的日俄戰爭中戰敗，視為奇恥大辱，但與中國長期被日本侵害、殺戮，而且至今將近八十年拒絕道歉，中、俄對日的恩怨不可同日而語。

因此，俄艦隊這次遠東演練，看來完全係為中國對日、台施壓助一臂之力，有攻守同盟的意味。

但中國人自古禮尚往來。獲俄拔刀相助，雖只屬象徵性，但下次俄艦隊在北歐演練，以北約為假想敵，中國是否也派航母率領艦隊遠航聲援？到時美歐肯定outcry！

且看美日如何回應中俄東亞合璧。

最後講一句：唔係踩台灣，但無論有幾多軍備，軍事管理令人不敢恭維。日常操作、演練意外頻生，每年總有十幾個官兵死於事故。軍人既質素、紀律似乎好有問題。咁點同對岸打？

220703日晚29°C 84%：一個時代的過去

宅咗幾日後，今午總算出外行咗個大運。

晚飯後累了，本不欲再「博」，但同日傳來2宗劃時代的噩訊。

7.2：以香港60-70年代基層社會溫馨題材留下《秋天的童話》《歲月神偷》等懷舊經典的導演、編劇羅啟銳猝逝，享年69，據聞心臟病突發。survived by導演拍檔兼伴侶張婉婷。

7.3：以《衛斯理》《原振俠》等系列經典稱雄文壇大半個世紀的作家、編劇倪匡7.3離世，享年87。2019曾公開透露患皮膚癌，無意接受化療。survived by妻、子、媳...。

羅導演係地道既香港仔；倪匡57年亦即中共建政後南來，與父親帶我來港咁啱同一年。

只不過，倪匡來港時已成年，我係中一生。佢係「laosung」，至今粵語都有江浙口音；我係生係廣州，粵語母語，從未回過祖籍，但當時夾硬要跟老豆填報籍貫「安徽」既「粵化人」。

唔怕講，我好憎呢種監粗塞埋離既祖籍。我唔識聽安徽話、冇安徽鄉里、未食過安徽餸、冇安徽習俗，連安徽有乜都唔知（除咗淮河、《鳳陽花鼓》、朱元璋），點算安徽人者？唔好自己呃自己啦！

問我邊度人，我學Pontius Pilate咁講：我老豆係安徽人。潛台詞係：係你地要我認既，與我無關。

49年-60年，南來的內地人累計怕有幾十萬。最早的一批如今陸續離去，下一波大概就輪到我呢代。

《童話》《神偷》我都睇過。發哥、鍾楚紅擔綱，以紐約唐人街為背景的《童話》，更係我係紐約唐人街編報時，係唐人街戲院裡睇既，相當於係旺角搵食既報紙佬，睇《旺角卡門》個種感覺。整個唐人街只有十條八條街，幾乎每日都行經既updut地方，Mott St., East Broadway, Pell St.，成為片中的經典場面，與有榮焉。

唐人街散仔發哥口中最煩，但其實心底最愛既「茶煲」，最終因為社會地位懸殊，未能與發哥結合。這是當年的現實，以今日的Just do it觀，絕對不會有這個遺憾。我地從唐人街小人物既角度，肯定好想戲裏既紅妹嫁發哥。

後來不時見發哥與紅姑行山、做運動既新聞，好開心佢地幾十年都係好好既朋友。希望佢地繼續開心生活，與民同樂。

但唔怕講，倪匡既小說，我一本都未睇過，甚至從來唔好奇。我雖然出身科學，但從小對科幻冇興趣。連Jules Verne既經典《地心探險記》《海底六萬里》，都只係睇過電影版。至於武俠，我來港初期，初二、初三衝咗幾部金庸、梁羽生，接著就要讀書為稻粱謀。倪匡，抱歉抱歉！

220704後補：MP〈年輕時被指反革命偷渡來港 倪匡自言反共 對港未來悲觀〉

220703日晨29°C 82%：树欲静而风不止

等咗一晚，以為一如昨晚預告，今週日清晨醒來就會冇嗮波。點知形勢變咗：3號會維持到中午。Delay no more!

當然，3號下風平浪靜，有公交，可照樣買餸食早餐，但與完全無波，滋味不同。

新聞標題話：呢次電腦一直低估 「暹芭Chaba」（泰文的朱槿，英文稱Rose of China或China rose，中國嶺南俗稱大紅花。），但冇話點解，我冇click入內文，no big deal。

因為，而家全市都係鋼筋水泥，颱風已傷不了人。財物損失大概也限於棚架、大樹倒塌之類。唯有特殊的情況，才造成嚴重的禍害：

昨有內地工程船在香港西南約300公里的內地水域作業，在狂風暴雨中斷開兩截。港接報派直升機趕往救援，30名船員只找到3人。似乎是回歸以來，港方參與救援的最嚴重海難。皇天保佑。

起床後，邊食麥皮邊skim新聞。BBC中文網的頭條最驚人：借美國自由派「智囊機構」Pew Research Center（皮尤）的民調放箭：

〈全球多數人對習近平正確處理國際事務無信心；三分二台受訪者認為自己只是台灣人；九成美國人視中國為對手，七成支持對華強硬；世界多國對華惡感飆升：新冠疫情、戰狼外交與中國國際形象〉。

日前，G7和北約就俄羅斯達成了新的共識後，接著當然就要回過頭來面向「威脅」可能更「厲害」的中國。

因此，Pew適時有此民調、BBC中文網力炒...，「正常」之極。Pew似乎源出於美國新聞業裡的自由派。BBC則除了基於價值觀，慣與中國抬槓，旗下的中文網更主要由源出於中國的另類意見人士支援。

220702六深夜28°C 86%：明天會更好

緊隨著領袖來訪，呢個颱風夠玩嘢。累我地掛足一日8號，今週六將近5點先落，然後公交先陸續恢復。但其時仍有啲風雨，我想出街買個飯盒頂夜晚個餐都窒住。真喺玩死！

預告聽日清晨即落嗮波。呢個週日市民實報復性出街。預定播疫啦！

講到疫情，「本確」連日在2000+徘徊，係第五波最低位~300既7倍。我睇後市升既機會大過跌。喜慶過後，一眾政要和社會領袖尤其要勤測。

領袖日前重申堅持清零。澳門爆疫後，全民檢測咗3次。我哋喺新班子領導下，是否都要處子下海？

但與此同時，似乎全世界都見獵心喜，爭住開關，搶回的旅遊收入。連內地都將入境隔離日數減半至「7+3」，並容許美國公民入境，不用說，面對的是上百萬原籍內地的華人。本港則看來獲中央首肯，將入境隔離減至「5+2」。旅外港人，尤其係十萬八萬留學五眼既港生，暑假可望回歸！

至於外遊，首次有港人「番去」日本後，相信接著就會去韓、台、星馬泰甚至歐洲。

雖然暫時未能說Happy days are here again。但應該是樂觀的，到底捱咗2年半啦！

至於對上通關，我估夏末有可能。內地一方面繼續嚴格防疫，但同時也開始鬆番的手，讓市場恢復，尤其係人員往來。否則，8萬公里高鐵只能減班減次，空空蕩蕩地上路。相反，美國後日獨立日，亦即國慶，預料有4,000萬人（佔人口~15%）揸車出遊，另有300幾萬人（佔人口1%）搭飛機。對主流美國人來說，抗疫？啋你都傻！口罩早就除咗，你戴at your own risk！

說到底，抗疫vs維生，是金庸《射鵰英雄傳》裏雙手互搏的玩意。一手打病毒，一手扶人民，讓大家繼續開心地生活，而唔係安全健康地百無聊賴、喊苦喊忽。求取平衡很靠政治智慧。注意：我說的是政治智慧，唔係科學智慧。科學係抗疫的基礎，但單靠科學來抗疫，雖然好少人病死，但只怕更多人悶死屈死，長遠來說，代價更難負擔。

完了，就此打住。祝明天會更好.

220701五晚8號28°C 82%：He came, he spoke, he conquered

7.1上午，雨停了，旗升了，新班上了，第二個25年的大方向明確了。

大典過後，領袖一行準備回京，才再下雨，入夜才來掛8號，似乎天公都落力配合。

25周年的大慶，一切按計劃順利完成。未來5年，750萬人可以朝著指明的方向奮鬥了。

媒體說，領袖過去兩天視察的領域，指出了香港今後安定繁榮以賴的兩大基石：

國安+創科。

的確，國安->安定&創科->繁榮，因此國安+創科就確保我們兼享安定與繁榮。

1+1=2，很簡單的數學公式，無人不明。

但落實時，這兩大基石，都要靠內地人才支援，才搞得上去。

本地人限於回歸前那150年的歷史背景：

1. 從來無須理會國安，因而在基因裡本無國安概念，先會搞出前幾年既大頭佛。因此，國安主力係國家既有關部門，輔以本地既紀律部隊。

2.一直靠對外貿易低買高賣來發達，懶理高風險、投資期長的創科。投資人長期以來信奉：「low tech撈嘢，high tech嚡嘢」。雖然今天這句股民聖經已過時，但本地人玩創科，純屬「博炒」。要港人瞓身，修讀、鑽研、開發、集資…十年生死兩茫茫，咪搞。用同樣的時間，儲錢買樓早已升咗幾個開。

因此，創科註定係靠內地既科技人才，本地人只係玩金融part：集資、上市、會計、法律，最多係開始玩下風險資本而已。說白了，打打邊鼓。

而創科既hub也係靠同港融合既深圳前海區。當然，西北大都會會類似加州硅谷的外圍，會系创科的peripheral。

說白了，創科係引入內地科技精英（包括从硅谷禮聘内地高才，就像當年台灣靠矽谷的台籍專家回流，打造出過去幾十年領先世界的晶圓業）來港騰籠換鳥，解決本地政治深層次矛盾既ultimate solution。這是絕對絕對的高招。特區政府同港人冇歷史觀、冇戰略眼光，就絕對想唔出呢種脫胎換骨的發展大計。

我絕對睇好。但港人裏的後現代派，怕就冇得撈啦！想走趁早。但即使唔走，內地都預咗會用將來繁榮既大收益離養起本地人。不過想搞嘢就唔好諗。到時港人新一代既意識已唔同，社會大局已定，你只怕仲未郁手，就已自取其辱。而且，冇人會可憐。