210917五晚29°C 75%：13世冇新意？

由於自己唔係用家，擒日唔記得講全球當然的頭條：iPhone 十三世亮相，月底就可到手。

其實身邊的人都用，但我俾唔出手1萬蚊買個電話。雖然mini五六千就有交易，但人老要睇大字，係買就要最闊身既Pro Max。我近年就苦於所有手機拉長機身，由16:9變嗮19:6。我唔打機（亦唔識打），長身對我係廢既。

3年前有幾個牌子都出16:9既Max，而家已廢嗮，淨番iPhone。但退休已久，要剩番的錢最後幾年：萬一無力自理，要額外開銷，手機最多3,000就算，iPhone再好，我都冇得欽羨。

但掃過標題，好似話：十三世冇新意，反而iPad Mini有驚喜。我其實幾想用8吋既Mini做電話，收埋係背包，戴個藍牙耳塞。咁就唔使既要用手機收WhatsApp，又要用平板睇劇。

但去Apple網頁睇落，iPad Mini雖然可以上5G，但只能用數據，亦即唔可以講電話。希望還有牌子願意出可以講電話既8吋平板啦！

上週新聞話，Honor近日會出番7.2吋既Max。但我估呢個7.2吋仍然係19:6，唔係16:9，長而唔闊。而且，最怕Honor依然被西方認定係華為既副牌，唔俾裝Google Play。

上面話齋，「內外有別」：係上邊可以揀國貨或iPhone；係香港想無憂慮，基本上只能揀iPhone、Samsung。用國貨一來怕俾西方block，二來多數型號唔銷香港，只有水貨。我試過，比行貨更少一重保障。新版既榮耀Max我念就係咁，用者責任自負。